«Dom tam, dzie ja?» Vyjšaŭ film pra biełaruskich tvorcaŭ, jakija nie mohuć viarnucca dachaty
Pra vychad u śviet filma «Dom tam, dzie ja?», paviedamiŭ u fejsbuku kiraŭnik Biełaruskaj Rady kultury Siarhiej Budkin.
Siarhiej Budkin i Jury Stylski
Siarhiej Budkin napisaŭ, prezientujučy tvor:
«My źniali kino.
Jaho hieroi — biełaruskija tvorcy, jakija nie mohuć viarnucca damoŭ. Ich raniejšaje žyćcio było zrujnavanaje spačatku teroram na Radzimie, a potym vajnoj va Ukrainie. Ale jany praciahvajuć žyć i radavacca žyćciu, stvarać i natchniać inšych.
Napeŭna, hety film pra pošuk siabie. I pra pošuk doma. Pra pošuk doma ŭ siabie. Pra zdolnaść zachavać siabie ŭ ekstrymalnych umovach. I pra vialikuju siłu Mastactva. Bo pakul my malujem, śpiavajem, fatahrafujem, pišam, stvarajem — my žyviem.
My zdymali na časovych kvaterach hierojaŭ, u ofisach, u chabie i šełtery, u halerejach, kaviarniach i barach, na oŭpen-ejry i ŭ kłubie, u tramvai, u mietro, padziemnym pierachodzie, na kanatnaj darozie, na vulicach, płoščach, u harach i kańjonach…
Było adčuvańnie, što my znachodzimsia ŭ viečnym ruchu i nie možam dazvolić sabie spynicca. Biažym, a teror i vajna iduć niedzie pobač, pa našych śladach…
Jak na hetym biahu nie vydychnucca i praciahvać stvarać, kali vakoł usio rujnujecca i ŭ ciabie niama doma? Voś na hetaje pytańnie ja i šukaju adkaz razam z hierojami».
Hierojami filma stali mastačka Taša Kacuba, fotamastačka Karalina Palakova, muzyka Jury Stylski i fatohraf Aleś Pilecki.
