Na hary Hiedymina ŭ Vilni paśla daždžoŭ znoŭ apoŭzień
Na paŭnočna-ŭschodnim schile hary Hiedymina ŭ Vilni paśla 24-hadzinnaha mocnaha daždžu ranicaj u sieradu byŭ zafiksavany apoŭzień, paviedamili ŭ Litoŭskim nacyjanalnym muziei. Hetym razam apoŭzień hleby, zdajecca, nie pahražaje ŭstojlivaści ŭsioj hary, raboty pa likvidacyi nadzvyčajnaj situacyi ŭžo pačalisia.
Śpiecyjalisty, jakija naviedali miesca apoŭźnia, prystupili da raspracoŭki mierapryjemstvaŭ pa stabilizacyi schiłu i spynieńni jaho mahčymaha pašyreńnia. Ściežka na haru Hiedymina z boku raki Vilenki na niekatory čas budzie zakrytaja dla naviedvalnikaŭ, padniacca na jaje možna na padjomniku z dvara Staroha Arsienała.
Jak paviedamili ŭ muziei, za stanam hary pastajanna sočać: ciapier fiksujecca pavyšany ŭzrovień vady, ale sama hara stabilnaja.
«Usie schiły hary Hiedymina prachodziać fizičny ahlad i aceńvajecca jaje stan paśla ŭčorašniaha daždžu», — havorycca ŭ paviedamleńni. U Nacyjanalnym muziei nie vyklučajuć mahčymaści źjaŭleńnia novych raskolin i apoŭźniaŭ, bo situacyja budzie zaležać ad nadvorja.
Maštabny apoŭzień na hary Hiedymina ŭ 2017 hodzie pryvioŭ da adkryćcia pachavańniaŭ XIX stahodździa. Paśla archieałahičnych raskopak i nastupnych daśledavańniaŭ vyjaviłasia, što heta pachavańni paŭstancaŭ 1863-1864 hadoŭ, pakaranych śmierciu rasijskimi ŭładami ŭ Vilni. Siarod ich akazalisia i pareštki nacyjanalnaha hieroja Biełarusi Kastusia Kalinoŭskaha.
Pierapachavańnie paŭstancaŭ 22 listapada 2019 hoda stała maštabnaj biełaruskaj nacyjanalnaj demanstracyjaj, uvieś šlach pracesii z Kafiedralnaj płoščy na mohiłki Rosy patanaŭ u bieła-čyrvona-biełych ściahach.
