Jašče adna biełaruskaja IT-kampanija pieraviezła biznes u Jeŭropu
Čarhovaja IT-kampanija z PVT — dyzajn-centr elektroniki Promwad — pieraniesła centr raspracoŭki ź Minska ŭ Vilniu i pieraviezła tudy ź Biełarusi bolšuju častku supracoŭnikaŭ, piša dev.by.
Promwad — dyzajn-centr elektroniki, zasnavany biełarusam Ramanam Pachołkavym. Kampanija raspracoŭvaje elektroniku dla televizaraŭ, aŭtamabilaŭ, pramysłovaści. U minskim centry raspracoŭki pracavali kala sta čałaviek.
«Historyja Promwad pačałasia ŭ 2004 hodzie ŭ Biełarusi. My stali pieršaj u krainie pryvatnaj kampanijaj, jakaja zabiaśpiečvała poŭny cykł raspracoŭki elektroniki: ad kancepcyi da zapusku sieryjnaj vytvorčaści. Inžyniery ź Biełarusi, Ukrainy i Rasii pracavali nad prajektami dla suśvietnych brendaŭ i stvarali ŭłasnuju biznes-ekasistemu.
U vyniku Promwad staŭ najbujniejšym niezaležnym dyzajn-centram elektroniki va Eschodniaj Jeŭropie», — raspaviali dev.by ŭ kampanii.
Z 2014 hoda kampanija pastupova pieravodzić biznes u ES.
«Siońnia Promwad — heta pa-sapraŭdnamu mižnarodnaja kampanija sa štab-kvateraj u Vilni. U nas pa-raniejšamu pracujuć inžyniery i mieniedžary z Ukrainy, Rasii i Biełarusi. Častka ź ich — supracoŭniki našaj jurydyčnaj asoby ŭ PVT», — raspaviali dev.by u kampanii.
Promwad («PRM Soft») pa-raniejšamu znachodzicca ŭ śpisie rezidentaŭ PVT.
HR-dyrektar Promwad Darja Hora patłumačyła, čamu Promwad nie płanuje poŭnaściu zakryvać ofisy ŭ Biełarusi i Rasii: «Pa-pieršaje, u nas jość abaviazacielstvy pa zapuščanych prajektach: my praciahvajem raspracoŭvać elektroniku i soft pa kantraktach, jakija byli padpisanyja jašče letaś. My šanujem reputacyju i nie možam pakinuć svaich klijentaŭ na paŭdarohi da zapusku ŭłasnych praduktaŭ.
Pa-druhoje, my budavali hety biznes i inžyniernuju supolnaść vakoł Promwad bolš za 18 hadoŭ. Heta stała mahčymym dziakujučy mocnaj inžyniernaj škole ŭ Biełarusi i miascovym śpiecyjalistam z unikalnymi viedami. My vierym, što kožny inžynier pavinien mieć mahčymaść realizavać svoj patencyjał niezaležna ad taho, dzie jon žadaje žyć».
«Z krainy źjazdžajuć tysiačy ludziej z zarpłataj 2500—3000 dalaraŭ». Jak adtok ajcišnikaŭ paŭpłyvaje na ekanomiku
