Vizuał Instagram-staronki Hrodna.life pryznali «ekstremisckim»
Ekstremisckimi pryznali vizualnyja materyjały — malunki, łahatyp, vadziany znak. Takoje rašeńnie pryniaŭ sud Leninskaha rajona Hrodna 13 červienia. Infarmacyja pra heta źjaviłasia ŭ Respublikanskim śpisie ekstremisckich materyjałaŭ, paviedamiła redakcyja vydańnia.
Ilustratyŭny zdymak
Pra jakija kankretna łahatypy i malunki idzie havorka, redakcyja pakul nie viedaje. Što da kantentu, to ŭvohule ŭ apošni čas na staroncy ŭ Instagram publikavalisia tolki karotkija videa z haradskich padziej: pracesii na katalickaje śviata Božaha Cieła, fiestyvalu nacyjanalnych kultur, adkryćcia vystavy šakaładu, śviata vajskovaj čaści ŭ mikrarajonie Foluš, parada dziciačych kalasak, śviata 9 maja. Sud paličyŭ, što hetyja videa — ekstremisckija.
Hetyja represii suprać papularnaha hrodzienskaha vydańnia — daloka nie pieršyja. U lipieni 2021 hoda sud Leninskaha rajona pryznaŭ «ekstremisckim» Telegram-kanał Hrodna.life. Pryčynaj stali vyjaŭlenyja siłavikami publikacyi, jakija ekśpierty paličyli «nakiravanymi na raspalvańnie sacyjalnaj i inšaj varožaści». Prykmiety «ekstremizmu» i «raspalvańnia varožaści» ekśpiertnaja kamisija znajšła ŭ niekatorych kamientarach čytačoŭ.
U vieraśni 2021 hoda redakcyja Hrodna.life atrymała pastanovu ad prakuratury Hrodzienskaj vobłaści. U joj paviedamili pra błakavańnie na terytoryi Biełarusi sajta Hrodna.life na terytoryi Biełarusi. Z taho momantu sajt dastupny tolki praz VPN.