Dva hady kałonii za kamientary pra sudździu, milicyjantaŭ i Łukašenku
10 červienia sud Baranavickaha rajona vynies rašeńnie pa spravie Taćciany Kupčynaj, jakuju abvinavačvali ŭ ździajśnieńni złačynstvaŭ pavodle adrazu troch kryminalnych artykułaŭ: č. 1 art. 368 «Abraza prezidenta Respubliki Biełaruś», art. 369 «Abraza pradstaŭnika ŭłady» i art. 391 KK «Abraza sudździ ci narodnaha zasiadaciela».
Sudovaje pasiadžeńnie ŭznačalvaŭ sudździa Mikałaj Kmita, paviedamlaje «Viasna»
U vinu žančynie stavili toje, što z 19 śniežnia 2020 hoda pa 30 listapada 2021 hoda, a taksama z 30 lipienia 2021 hoda pa 7 listapada 2021, «majučy namier na publičnuju abrazu pradstaŭnikoŭ ułady ŭ suviazi z vykanańniem imi słužbovych abaviazkaŭ», paśla prahladu publikacyj u Telegram Taćciana pakinuła ŭ internecie abraźlivyja kamientary pra Łukašenku, supracoŭnikaŭ milicyi i sudździu Pieršamajskaha rajona Minska. Proźviščy paciarpiełych nie nazyvajucca.
Rašeńniem suda žančynu pryznali vinavataj u ździajśnieńni złačynstvaŭ pavodle ŭsich troch artykułaŭ.
- Pa č. 1 art. 368 KK abvinavačanaj pryznačyli pakarańnie ŭ vyhladzie źniavoleńnia terminam na 1 hod 6 miesiacaŭ.
- Pa art. 369 KK jaje pakarali źniavoleńniem na termin 1 hod 6 miesiacaŭ sa štrafam u pamiery 200 bazavych (6 400 rubloŭ).
- Pa art. 391 KK Taćcianu Kupčynu asudzili da aryštu na 3 miesiacy.
U adpaviednaści z č. 1, 2, 6 art. 72 KK, pa sukupnaści złačynstvaŭ šlacham častkovaha składańnia pryznačanych asnoŭnych pakarańniaŭ i dałučeńnia dadatkovaha pakarańnia kančatkova abvinavačanuju asudzili da pazbaŭleńnia voli terminam na 2 hady z adbyvańniem pakarańnia ŭ papraŭčaj kałonii va ŭmovach ahulnaha režymu. Taksama rašeńniem suda abvinavačanaja pavinna vypłacić štraf u pamiery 200 bazavych vieličyń (6 400 rubloŭ) i kampiensavać paciarpiełym maralnuju škodu ŭ pamiery 4 000 rubloŭ.
Mabilny telefon jak pryładu ździajśnieńnia złačynstva ŭ Taćciany Kupčynaj kanfiskavali ŭ prybytak dziaržavy.
Prysud nie nabyŭ zakonnuju moc, moža być abskardžany i apratestavany ŭ vyznačanym zakanadaŭstvam paradku.
