Novaja chłuśnia BiełTA: na 40 miljardaŭ dalaraŭ. U jakaści «dokazaŭ» — kamientary tvitarskich noŭnejmaŭ
Rasijskaja i łukašenkaŭskaja prapahanda imknucca pierakanać čytačoŭ u tym, što va Ukrainie masava raskradajecca vajennaja i hrašovaja dapamoha ad zachodnich krain. «Dokazy» ŭ prapahandystaŭ žalezabietonnyja — kamientary botaŭ i noŭnejmaŭ u tvitary, jakija ŭsurjoz vydajucca za ekśpiertnaje mierkavańnie. Tłumačym, jak skanstrujavany fejk hetym razam.
Rasijskaje «RIA Novosti», a śledam za im i inšyja pamyjnyja sajty razam z BiełTA, vypuścili kryklivy artykuł, u jakim śćviardžajecca: «Amierykancy abvinavacili ZŠA i Ukrainu ŭ kradziažy 40 miljardaŭ dalaraŭ vajennaj dapamohi Kijevu». Nahadajem, niadaŭna prezident Złučanych Štataŭ Džo Bajden paviedamiŭ Uładzimiru Zialenskamu, što vyłučaje miljard (nie 40, a miljard) dalaraŭ na vajennuju dapamohu Ukrainie.
U jakaści dokazu hetaha śćviardžeńnia prapahandysty nie pryvodziać ani vynikaŭ sacyjałahičnnaha apytańnia amierykancaŭ, ani vykazvańniaŭ ekśpiertaŭ ci lidaraŭ hramadskaj dumki. Niama tam navat replik marhinalnych prakramloŭskich błohieraŭ, jakich rasijskija prapahandysty lubiać vydavać za «ekśpiertaŭ». Niama navat lubimych vykrutaŭ prapahandystaŭ u vyhladzie manipulatyŭnaha apytańnia minakoŭ na vulicy, dzie śviadoma padabranyja, vyhadnyja prapahandystam adkazy vydajucca za hramadskuju dumku. Adziny «dokaz», jaki pryvodziać prapahandysty, heta… kamientary botaŭ i ananimaŭ-noŭnejmaŭ ź dziŭnymi nikami u tvitary, jakija vydajucca za «mierkavańnie amierykancaŭ».
«A kudy padzieli papiarednija 40 miljardaŭ?», — publikuje «RIA Novosti» i «BiełTA» kamientar karystalnika tvitara ź nikam Bitcoin on a Buffalo.
«Čamu my ŭsio jašče niasiom finansavuju adkaznaść za heta?» — publikujuć prapahandysty «vykazvańnie» Android John.
Tłumačym, čamu heta manipulacyja.
Pa-pieršaje, prapahandysty z «RIA Novosti» (a za imi i BiełTA) pryvodziać tolki niki hetych karystalnikaŭ tvitara i ichnyja «kamientary» na ruskaj movie, ale prapahandysty nie paznačajuć navat spasyłak (ci chacia b skrynšotaŭ) hetych kamientaroŭ.
Pa-druhoje, karystalniki z takimi nikami i praŭda isnujuć. Ale nidzie ŭ ich profili niama navat śćviardžeńnia, što jany z Amieryki.
Pa-treciaje, sami staronki pryviedzienych «RIA Novosti» akaŭntaŭ vyhladajuć jak typovyja staronki botaŭ, a nie realnych ludziej. Zamiest imion — dziŭnyja nazvy nikaŭ (Bitcoin on a Buffalo, Android John, Giorgio Latte), poŭnaja adsutnaść asabistych fotazdymkaŭ ci niejkaj infarmacyi, pa jakoj možna było b vieryfikavać sapraŭdnaha karystalnika, amal poŭnaja adsutnaść padpisčykaŭ.
Navat kali heta byli b i realnyja ludzi, vydavać adzinkavyja kamientary abyvacielaŭ u internecie za amierykanskuju hramadskuju dumku — manipulacyja.
Rasijskaja prapahanda ź pieršych dzion vajny śćviardžaje, što cyvilnyja ŭłady Ukrainy raskradajuć zachodniuju vajskovuju dapamohu. Asobnyja vypadki ź jaje raskradańniem sapraŭdy zdarajucca, ale ŭsie jany tyčacca raskradańnia na nizavym uzroŭni, kali asobnyja machlary prysvojvajuć achviaravańni indyvidualnych dabračyncaŭ. U vajennaj realnaści heta niepaźbiežnaja situacyja, navat u tatalitarnych krainach padčas vajny było toje samaje. Ale niama nijakich dokazaŭ i śviedčańniaŭ taho, što zachodniaja dapamoha nasamreč raskradajecca centralizavana, u vialikich maštabach.
Rasija źjaŭlajecca adnym z suśvietnych lidaraŭ pa raspaŭsiudžvańni dezynfarmacyi ŭ internecie, jana sistemna hetym zajmajecca z 2007 hoda. U rasparadžeńni kramloŭskaj prapahandysckaj mašyny pracujuć cełyja armii botafiermaŭ i šmatmiljardnyja biudžety. Adnu z hałoŭnych rasijskich «fabryk trolaŭ» utrymlivaje «kuchar Pucina» Jaŭhien Pryhožyn. Rasijskija boty pracujuć jak na ŭnutryrasijskuju, tak i na zamiežnuju aŭdytoryju.
Siarod hałoŭnych metaŭ kramloŭskich botaŭ: stvaryć uražańnie masavaści padtrymki peŭnych dziejańniaŭ Kramla ci jaho naratyvaŭ, dyskredytavać palityčnych apanientaŭ i demakratyčnyja krainy, ukinuć u publičny dyskurs u ramkach «postpraŭdy» samyja absurdnyja viersii, vieści dezynfarmacyjnyja kampanii na zamiežža.
Z pačatkam haračaj fazy rasijska-ŭkrainskaj vajny biełaruskaja prapahanda była całkam padparadkavanaja rasijskaj pa źniešniepalityčnych pytańniach. Biełaruskija dziaržaŭnyja prapahandysckija resursy stali nie prosta filijałami rasijskich, a ich retranślatarami. BiełTA, BT, ANT i STB časam prosta repościać samyja absurdnyja paviedamleńni rasijskaj prapahandy. Puł prapahandysckich śpikieraŭ u łukašenkaŭskaj i kramloŭskaj prapahandy taksama staŭ amal identyčnym.
