Bellingcat: U zachodnich śpiecsłužbaŭ, vierahodna, jość «krot» na samym vysokim uzroŭni, vyšejšy za Łaŭrova
Amierykanskaja raźviedka była adzinaj, jakaja adnaznačna papiaredžvała pra pačatak vajny va Ukrainie. Prezident ZŠA Džo Bajden rabiŭ pra heta admysłovyja publičnyja zajavy, ryzykujučy, jak tady zdavałasia, svajoj reputacyjaj. Svajo mierkavańnie pra toje, jak amierykancy atrymali infarmacyju pra pačatak vajny va Ukrainie, žurnalist-daśledčyk Bellingcat Chrysta Hrozieŭ vykazaŭ jutub-kanału «Prodołžienije śledujet».
Pasiadžeńnie Savieta Biaśpieki Rasijskaj Fiederacyi, 21 lutaha 2022 hoda. Fota: kremlin.ru
Chrysta Hrozieŭ kaža, što ŭ pačatak vajny nie vieryli nie tolki abyvacieli ci navat analityki. U jaho nie vieryli i jeŭrapiejskija vyviedki. Hety fakt, razvažaje Hrozieŭ, paćviardžajecca tym, što
šef niamieckaj raźviedki byŭ u Kijevie za dva dni da pačatku vajny. «Tamu što jon nie vieryŭ. Inakš šef raźviedki Hiermanii nie pavinien byŭ być u Kijevie, kali ŭ luby momant moža pačacca vajna».
Pavodle Hrozieva, jeŭrapiejskija raźviedki nie daviarali amierykanskim kaleham, tamu što tyja nie dzialilisia ź imi krynicaj hetych źviestak. «Jany [jeŭrapiejskija raźviedki] kazali: u nas ža jość takija ž srodki elektronnaj vyviedki, takija ž dostupy da spadarožnikaŭ, i ŭ nas taksama jość «kraty» (ahienty ŭnutry struktur supraćlehłych bakoŭ, — NN). I my bačym tolki «papieradžalnyja» streły, Pucin sprabuje prystrašyć, ale realna my bolš ničoha nie bačym».
Hrozieŭ kaža, što 99% rasijskich siłavikoŭ taksama nie dumali, što vajna pačniecca. Heta značyć, amierykancy viedali i bačyli niešta, što bolš za 99% rasijskich siłavikoŭ nie viedali. Jak hetaha možna było damahčysia?
«Tolki majučy «krata» na samym vysokim uzroŭni ci niejkaje supiertechnałahičnaje rašeńnie, pra jakoje nichto jašče nie viedaje. Tamu što kali b jano było viadomaje, to siłaviki pryniali b miery, kab jaho niejtralizavać. Tamu dla mianie heta kambinacyja abodvuch [krynic infarmacyi], ale viadučym pavinien byŭ być vysokapastaŭleny «krot», jaki zmoh apisać pierakanaŭča toje, što zdavałasia niełahičnym», — kaža Hrozieŭ.
Nakolki «krot» pavinien być vysokapastaŭlenym?
«Heta pavinien być čałaviek vyšejšy ŭ hetym łancužku za Łaŭrova. Ja absalutna pierakanany, što Łaŭroŭ nie viedaŭ, što vajna pačniecca», — kaža Hrozieŭ.
Pavodle jaho danych, pra pačatak vajny viedali kala 20 vysokapastaŭlenych rasijskich čynoŭnikaŭ. «Tak što heta adzin z hetych 20».
Zrešty, rasśledavalnik vykazvaje adnu zdahadku. Za niekalki tydniaŭ da vajny novaja elitnaja PVK zajmałasia jaje padrychtoŭkaj, jaje śpiecyjalisty taksama mahli być kanałam dla źlivu. Voś tolki nakolki takaja krynica była b pierakanaŭčaj dla taho, kab Bajden ryzykavaŭ svajoj reputacyjaj?
Chrysta Hrozieŭ: Novaja stadyja hetaj vajny, kali Pucin nie vieryć nikomu i sam užo daje zahady. Heta budzie vielmi cikava
Rasśledavalniki: Niadaŭna pryznačanaha kamandujučaha apieracyjaj Rasii va Ukrainie Dvornikava adchilili. Pryznačany novy
Hrozieŭ: Rasija straciła najlepšych desantnikaŭ
