«Na front? Dziakuj vialiki». Jak rasijskija deputaty reahujuć na prapanovu zapisacca ŭ armiju, što vajuje
Vajennaje stanovišča ŭ Rasii nie abvieščanaje, ale na ŭkrainskim froncie rasijskija vojski niasuć surjoznyja straty, i, kab papoŭnić armiju novymi žaŭnierami, z pačatku krasavika Minabarony RF prapanuje padpisvać karotkaterminovyja kantrakty, a ŭłady skasavali ŭzrostavuju płanku dla ŭdziełu ŭ bajavych dziejańniach. Z pačatku vajny šerahi ŭzbrojenych sił Ukrainy i terabarony papoŭnili viadomyja palityki, žurnalisty i muzyki. U suviazi z hetym Bi-bi-si vyrašyła spytać u rasijskich publičnych prychilnikaŭ vajny, ci hatovyja jany sami adpravicca na front. Bo Ministerstvu abarony RF nastolki patrebnaje papaŭnieńnie, što rekłamu karotkaterminovych kantraktaŭ možna sustreć navat u hramadskim transparcie.
«Adpravicca na front? Dziakuj vialiki»
Pieršymi, da kaho my źviarnulisia, byli deputaty Dziarždumy, što ŭ kancy lutaha hałasavali za pryznańnie «DNR» i «ŁNR». Mienavita pryznańnie samaabvieščanych respublik pa sutnaści dało Rasii farmalnaje prava pačać vajnu.
Adnak prychilniki vajny na front nie śpiašajucca. Leanid Słucki (54 hady), Piotr Tałstoj (52 hady), Siarhiej Bajarski (42 hady) i Kanstancin Bacharaŭ (49 hadoŭ) pračytali piśmovaje pytańnie i nie adkazali.
40-hadovy deputat Uładzimir Burmataŭ paśla pračytańnia paviedamleńniaŭ u WhatsApp prosta adpraviŭ numar karespandenta Bi-bi-si ŭ čorny śpis.
Deputat Siarhiej Bidońka (46 hadoŭ) vysłuchaŭ pytańnie i pakłaŭ słuchaŭku.
Ale niekatoryja — jak, naprykład, 30-hadovy deputat ad ŁDPR i vice-śpikier Dziarždumy Barys Čarnyšoŭ — byli bolš havarkimi.
«Da USU dałučylisia ŭkrainskija palityki, kulturnyja dziejačy, žurnalisty. Ci nie źbirajeciesia vy zdać mandat i padavacca na vajskovyja vakansii Minabarony?» ‒ zapytałasia karespandentka Bi-bi-si.
«My i tak padtrymlivajem uzbrojenyja siły Rasijskaj Fiederacyi całkam. My z hrupaj deputataŭ ad frakcyi ŁDPR byli ŭ Daniecku niadaŭna i ŭsialak pracujem nad tym, kab śpiecapieracyja naša praciahvałasia i my pieramahli. My jak dapamahali, tak i budziem dapamahać uzbrojenym siłam Danieckaj respubliki i ŭzbrojenym siłam RF. U cełym, u nas taki kurs zaŭsiody byŭ, zastajecca i budzie», — skazaŭ Čarnyšoŭ.
Paśla ŭdakładniajučaha pytańnia, ci nie źbirajecca jon dałučycca da vojska, jon adkazaŭ: «Dziakuj vialiki» ‒ i pakłaŭ słuchaŭku.
A voś jaho kaleha pa partyi, pieršy namieśnik kiraŭnika frakcyi ŁDPR, 26-hadovy Vasil Ułasaŭ zaŭvažyŭ, što «kali budzie patreba, budzie zapyt, to, viadoma [dałučusia da rasijskaj armii]».
«Buduć zvaroty ‒ pojdziem»
«Ja nie tak daŭno viarnuŭsia z Łuhanska ź vialikaj delehacyjaj ŁDPR, jakaja tam była z humanitarnaj misijaj. Mnie zdajecca, što deputaty [Dziarždumy] nie ŭsie słužyli ŭ vojsku, chtości mieŭ dośvied słužby i moža pa kantrakcie ciapier pajści słužyć. Ale ŭ asnoŭnym usie imknucca znajści mahčymaść sa svajho zarobku [dapamahać] abo znachodzić ludziej, jakija hatovyja akazać humanitarnuju dapamohu».
«Heta značyć, vy pakul nie hatovyja skłaści mandat i pajści vajavać?»
«Nieabaviazkova składać mandat. Adam Dzielimchanaŭ nie składaŭ ź siabie paŭnamoctvaŭ deputata Dziarždumy», — adkazaŭ Ułasaŭ, majučy na ŭvazie narodnaha vybrańnika ad Čačni, jaki nie prosta rehularna źjaŭlaŭsia ŭ Maryupali ŭ vajskovaj formie sa zbrojaj, ale navat atrymaŭ ad prezidenta Uładzimira Pucina zvańnie «Hieroja Rasii».
«Ale vy hatovyja byli b, kali b patrebna była vaša dapamoha mienavita ŭ bajavych dziejańniach?»
«Viadoma, buduć na toje zvaroty, to pojdziem», ‒ paŭtaryŭ svoj adkaz Ułasaŭ.
Jašče adnamu maładomu deputatu Dziarždumy, 25-hadovamu Maksimu Hulinu ad partyi «Novyja ludzi», datelefanavaŭsia deputat harsavieta Novasibirska Siarhiej Bojka. Supracoŭnica jahonaj kamandy pradstaviłasia rabotnikam vajenkamata i paskardziłasia, što nie moža ŭručyć jamu pozvu.
Hulin ździviŭsia takomu intaresu da jaho piersony, tak jak, pa jaho słovach, u jaho jość adterminoŭka ad vojska na čas navučańnia ŭ aśpirantury i pracy deputatam.
«Naŭrad ci ja budu karysny»
Deputat Aleh Matviejčaŭ (52 hady) ‒ adzin z aŭtaraŭ zakonaprajekta ab pavyšeńni ŭzrostu dla zaklučeńnia pieršaha vajskovaha kantrakta. Na pytańnie, ci nie choča jon adpravicca na front, raz uzrostavaja miaža źniataja, zajaviŭ, što «dla deputataŭ uzrostavaja miaža ‒ nie prablema».
Pieraškodaj, na jahonuju dumku, źjaŭlajecca pazicyja śpikiera Dziarždumy Viačasłava Vałodzina, jaki zajaviŭ, što deputaty pavinny pracavać u parłamiencie, a nie jeździć na Danbas.
«Tyja, chto maje adpaviednuju padrychtoŭku, jany jeździli. Učora Dzielimchanaŭ viarnuŭsia z rajona bajavych dziejańniaŭ, u jakich udzielničaŭ. Dzielimchanaŭ maje vajennuju padrychtoŭku, jon moža i jeździć [vajavać]. Bolšaść deputataŭ nie źjaŭlajucca vajennymi prafiesijanałami», — praciahvaŭ jon.
«Vy sami nie źbirajeciesia? ‒ pacikaviłasia karespandentka Bi-bi-si.
«Nie, ja dakładna nie naležu da [vajennych]. Ja ŭ infarmacyjnym kamitecie znachodžusia, usio, što tyčycca infarmacyjnaj palityki — kali łaska. Naŭrad ci ja budu karysny jak vajskoviec, tym bolš jość vielizarnaja kolkaść dobraachvotnikaŭ, jakija i tak źjaŭlajucca prafiesijnymi vajskoŭcami».
Niazručnaja tema
Niehatoŭnaść da razmovy demanstruje niazručnaść temy dla rasijskich publičnych fihur, jakija padtrymlivajuć vajnu. Adna sprava vieści prapahandysckija kampanii, inšaje ‒ ryzykavać ułasnym kamfortam.
Madel mabilizacyi, jakaja isnuje ŭ Rasii, vymahaje taho, što samyja paśladoŭnyja prychilniki vajny pavinny jak maha hučniej kryčać ab jaje spraviadlivym charaktary i «zaklikać zhurtavacca vakoł prezidenta», kaža fiłosaf i hałoŭred vydańnia «Novaja hazieta. Jeŭropa» Kirył Martynaŭ.
Pry hetym niepasredna ŭ vajnie ŭdzielničajuć i hinuć na froncie zusim inšyja ludzi — u asnoŭnym vychadcy z samych biednych rehijonaŭ Rasii, što, na dumku Martynava, adlustroŭvaje isnuju sacyjalnuju sistemu:
«adnym dastajucca pachavanki, inšym ‒ novyja biznes-mahčymaści va «ŭmovach biahučaj situacyi».
«Tamu kali čałavieku, jaki publična padtrymlivaje vajnu, prapanujuć niepasredna ŭ joj udzielničać, heta ŭsprymajecca jak parušeńnie hramadskaha paradku. Vajna ž nie dla ich pieršapačatkova pryznačałasia, u ich jość bolš važnyja i terminovyja spravy. Čałaviek, jaki prapanuje vajaŭničamu prapahandystu abo čynoŭniku adpravicca na vajnu, u vačach prydvornaha pucinskaha hramadstva — vidavočny pravakatar abo praściak, jaki nie razumieje, jak uładkavany śviet», — kaža Martynaŭ.
Ale jość palityki, jakija hatovyja pajechać na vajnu. Akramia Dzielimchanava, pra jakoha zhadaŭ Maćviejčaŭ, z deputataŭ na vajnu pajechaŭ były premjer niepryznanaj DNR Alaksandr Baradaj — na apošnich vybarach jon trapiŭ u parłamient ad «Adzinaj Rasii».
«Ja kamanduju dobraachvotnickimi padraździaleńniami, jakija vajujuć na linii frontu. U mianie dva bataljony i try atrady — heta bolš za paŭtary tysiačy čałaviek. Našy častki znachodziacca na paŭnočnym kirunku — rajon Iziuma, rajon Bałaklei. Ja tam užo doŭha, nakolki doŭha — vas nie tyčycca», — raspavioŭ Baradaj Bi-bi-si.
«Ja pravilna zrazumieŭ, što vy mnie raicie adpravicca ŭ vajenkamat?»
Karespandent Bi-bi-si Andrej Zacharaŭ užo bolš za miesiac pytajecca ŭ publičnych prychilnikaŭ vajny ŭ sacsietkach, ci nie chočuć jany skarystacca mahčymaściu adpravicca na front, skarystaŭšysia vakansijami Minabarony.
Reakcyja hetych publičnych fihur anałahičnaja adkazam deputataŭ. Naprykład, były pres-sakratar «Antymajdana» Valeryj Zabaroŭski prosta zabłakavaŭ Zacharava ŭ «Tvitery». Hetak ža zrabiŭ i kiraŭnik Raskosmasa Dźmitryj Rahozin — jaho karespandent Bi-bi-si spytaŭ, ci adpraviŭ jon spasyłki na vakansii Minabarony svajmu 38-hadovamu synu Alaksieju, jaki ciapier zajmaje pasadu dyrektara ŭ małaviadomaj niekamiercyjnaj arhanizacyi.
Rahozin pravodzić ekskursiju pa kasmadromie «Uschodni». Fota: AR
«Mienš za ŭsio mnie patrabnyja parady ad «žurnalista» pamyjnicy-Fantanki», — tak spačatku adreahavaŭ na prapanovu pajechać na vajnu viadomy ŭ minułym błohier, supracoŭnik «Fondu efiektyŭnaj palityki» i siabra kłuba rekanstruktaraŭ «Maskoŭski hrenadzior» Cimafiej Šaviakoŭ (jon mieŭ na ŭvazie minułaje miesca pracy Zacharava — hazietu «Fontanka.ru»). A potym taksama zabłakavaŭ jaho — ale ŭ «Fejsbuku».
U «Fejsbuku» išła dyskusija i z kiraŭnikom pradstaŭnictva Rassupracoŭnictva ŭ Turcyi Alaksandram Satničenkam, jaki ŭ intervju «Komsomolskoj pravdie» pa sutnaści zajaviŭ, što pakul adnyja iduć na front, «zdradniki» emihrujuć u Stambuł. «Vybačajusia, ja pravilna zrazumieŭ, što vy mnie raicie adpravicca ŭ vajenkamat?» ‒ krychu pahardliva ŭdakładniŭ jon spačatku. A potym dadaŭ:
«Što ž tyčycca vašaj prapanovy [padpisać karotkaterminovy kantrakt], ja ŭ ciapierašni čas užo znachodžusia na dziaržaŭnaj słužbie, dziaržava viedaje dzie ja i čym zajmajusia, kali paličyć, što mianie treba nakiravać u armiju — značyć pajdu».
Lidar frakcyi «Spraviadlivaja Rasija — Patryjoty — Za praŭdu» Siarhiej Mironaŭ u adkaz na prapanovu adpravić spasyłki na voinskija vakansii svajmu synu, zajaviŭ, što toj, maŭlaŭ, «darosły i samastojny», tamu sam vyrašyć, što jamu rabić. Adnak paśla vyśvietliłasia, što jaho syn ad pieršaha šlubu Jarasłaŭ ‒ suprać vajny, pra što nie baicca pisać u sacsietkach.
«Svaju pazicyju asabista ja jamu paviedamiŭ jašče ŭ sakaviku, jon pra jaje viedaje. Niejak heta abmiarkoŭvać jon nie staŭ, prosta vietliva skončyŭ razmovu», — raspavioŭ Jarasłaŭ Mironaŭ Bi-bi-si.
