U «asudžanaha» ŭ Daniecku da śmiarotnaha pakarańnia marakanca jość ukrainskaje hramadzianstva
Marakaniec Brachim Saaŭdun, «asudžany» da śmiarotnaha pakarańnia ŭ tak zvanaj «DNR», maje ŭkrainskaje hramadzianstva. Pra heta paviedamlaje jaho baćka Tachar Saaŭdun, piša Reuters.
Mužčyna atrymaŭ ukrainskaje hramadzianstva ŭ 2020 hodzie paśla prachodžańnia hadavoj vajennaj padrychtoŭki dla vyvučeńnia aerakaśmičnych technałohij va ŭniviersitecie ŭ Kijevie.
Tachar Saaŭdun skazaŭ, što jaho syn zdaŭsia «dobraachvotna», i ź im varta abychodzicca jak z «vajennapałonnym». Pavodle jaho słoŭ, prysud budzie abskardžany i siamja nie maje kantaktu z advakatam dla abmienu jurydyčnaj infarmacyjaj.
Pa słovach krynicy Reuters, Saaŭdun «trapiŭ u pałon u formie ukrainskaj armii».
Paśla rasijskaha ŭvarvańnia va Ukrainu ministerstva zamiežnych spraŭ Maroka zajaviła, što padtrymlivaje «terytaryjalnuju cełasnaść i nacyjanalnaje adzinstva ŭsich dziaržaŭ-členaŭ AAN», ale adkryta nie asudziła rasijskaje ŭvarvańnie.
Razam z Saaŭdunam paŭstali pierad «sudom» dvoje brytanskich hramadzian, 28-hadovy Ejden Aślin i 48-hadovy Šon Piner. Usie jany nie byli najmitami. Jany byli vajskoŭcami ŭkrainskaj armii jašče da pačatku vajny i byli daŭno intehravanyja va ŭkrainskaje hramadstva. Rasijskaja prapahanda vykarystoŭvaje «sud» nad hetymi ludźmi ŭ svaich metach, kab pakazać, što za Ukrainu, nibyta, vajujuć najmity.