Łukašenka padpisaŭ ukaz, jaki moža palehčyć žyćcio tym, chto buduje pryvatny dom
Ukazam Łukašenki spraščajecca paradak uźviadzieńnia i rekanstrukcyi adnakvaternych žyłych damoŭ i haspadarčych pabudoŭ, paviedamlaje jahonaja pres-słužba.
Zdymak ilustracyjny. Fota: m.pro-n.by
Dakumient, jaki ŭstupaje ŭ siłu praz 6 miesiacaŭ, praduhledžvaje, što takija abjekty možna budzie pabudavać biez atrymańnia dazvołaŭ, biez raspracoŭki prajektnaj dakumientacyi i biez nastupnaj pryjomki ich u ekspłuatacyju.
Dla budaŭnictva abo rekanstrukcyi adnakvaternych žyłych damoŭ i haspadarčych pabudoŭ u sielskich nasielenych punktach (za vyklučeńniem raźmieščanych na terytoryi rajonaŭ, prylehłych da abłasnych centraŭ i Minska) hramadzianam dastatkova mieć dakumient, jaki śviedčyć pra prava na ziamielny ŭčastak.
Dla ŭźviadzieńnia takich pabudoŭ u sielskich nasielenych punktach, raźmieščanych na terytoryi rajonaŭ, prylehłych da abłasnych centraŭ i Minska, u pasiołkach haradskoha typu i haradach hramadzianinu nieabchodna budzie atrymać pašpart zabudoŭščyka. Na padstavie takoha pašparta zmohuć pabudavać žyłyja adnakvaternyja damy taksama i jurydyčnyja asoby, indyvidualnyja pradprymalniki.
Vydača pašparta zabudoŭščyka budzie rabicca pavodle pryncypu «adno akno», termin afarmleńnia — adzin miesiac, košt — 25 bazavych vieličyń.
Akramia taho, ukazam praduhledžany sproščany paradak dziaržaŭnaj rehistracyi pabudavanych takim čynam abjektaŭ. Ciapierašni paradak uźviadzieńnia i rekanstrukcyi hetych pabudoŭ (z atrymańniem usich dazvołaŭ, uzhadnieńniaŭ, zaklučeńniaŭ i raspracoŭkaj prajekta) taksama zachoŭvajecca.
Rašeńnie ab prymianieńni sproščanaha paradku prymajecca zabudoŭščykami samastojna. Skarystacca takim paradkam možna budzie pry ŭźviadzieńni abjektaŭ na terytoryi ŭsioj krainy, za vyklučeńniem Minska.
