Małady šmatdzietny baćka bienzapiłoj vyhnaŭ z doma asob u cyvilnym, jakija pryjšli pa jaho žonku. U vyniku pasadzili jaho
Zdaryłasia heta ŭ Rečycy. U toj dzień u dom da Michaiła Karasiova pryjšli dvoje asob u cyvilnym, jakija paprasili prajści ź imi žonku mužčyny. Michaił sprasonku vyrašyŭ, što heta złodziei, zavioŭ bienzapiłu i vyhnaŭ ich. Vyjaviłasia, što heta łukašysty i majuć pretenzii da žančyny za antyvajennyja vykazvańni.
Michaił Karasioŭ
Jak stała viadoma «Našaj Nivie», heta adbyłosia 2 sakavika 2022 hoda. Žonka Michaiła pabudziła muža, jaki spaŭ paśla pracy, i skazała, što da ich pryjšli, mabyć, milicyjanty.
Michaił padumaŭ, što ŭ dom uvarvalisia złodziei, tamu što jon da hetaha bačyŭ niekalki abjaŭ ab tym, što ŭ horadzie arudujuć bandyty, jakija pradstaŭlajucca supracoŭnikami milicyi, a sami vymańvajuć haspadaroŭ i rabujuć damy.
Mužčyna ŭziaŭ bienzapiłu, kab prystrašyć i vyhnać niaprošanych haściej. Supracoŭniki pravaachoŭnych orhanaŭ źbiehli, a praź dziesiać chvilin paśla hetaha da ich pryjechaŭ milicejski narad.
Ciažarnuju žonku mužčyny pastavili na kaleni, joj mocna vykrucili ruki. U žančyny zastalisia siniaki.
Michaiłu załamali ruki i pavieźli ŭ adździaleńnie milicyi. Mužčynie pradjavili 364 artykuł Kryminalnaha kodeksa («Hvałt abo pahroza prymianieńnia hvałtu ŭ dačynieńni da supracoŭnika orhanaŭ unutranych spraŭ»). Maksimalnaje pakarańnie pa hetym artykule praduhledžvaje pazbaŭleńnie voli na termin da siami hadoŭ. Taksama ź Michaiła patrabujuć maralnuju kampiensacyju.
Jaho žoncy dali dva administracyjnyja artykuły — 19.11 (raspaŭsiud, vyrab, zachoŭvańnie, pieravozka infarmacyjnaj pradukcyi, jakaja źmiaščaje zakliki da ekstremisckaj dziejnaści abo jakaja prapahanduje takuju dziejnaść) i 24.3 (niepadparadkavańnie zakonnamu rasparadžeńniu abo patrabavańniu słužbovaj asoby pry vykanańni im słužbovych paŭnamoctvaŭ).
Jak vyśvietliłasia paśla, pieršapačatkova milicyjanty pryjšli zatrymlivać žonku Michaiła za jaje vykazvańnie ŭ kamientarach ŭ adnym z telehram-kanałaŭ suprać vajny.
Siamja Michaiła šmatdzietnaja, u pary čaćviora dziaciej. Aryštavać žančynu pa zakonie nie mahli, dali štraf — 600 rubloŭ.
U samaho Michaiła jość aŭtaimunnaje zachvorvańnie — sarkaidoz. Jamu treba prymać nieabchodnyja leki, ale ich u homielskaje SIZA №3 jamu nie pieradajuć. Apošni raz ad svajakoŭ mužčyny ŭziali tolki pradukty, adzieńnie viarnuli nazad.
U listach Michaił pisaŭ, što pakul trymaje pazityŭny nastroj. Ale niekalki tydniaŭ tamu ŭsio źmianiłasia. Stan staŭ depresiŭny, svajaki chvalujuca, što ŭ SIZA mužčynu mohuć katavać.
Nakolki viadoma, 29-hadovy mužčyna pracavaŭ na Rečyckim mietyznym zavodzie mašynistam krana i ad palityki byŭ daloki.
Ciapier žonka Michaiła z čatyrma dziećmi vyžyvajuć na źbieražeńni, im dapamahajuć baćki. Dekretnyja hrošy (heta ahułam 700 rubloŭ) žančyna tracić na advakata dla muža.
Čytajcie taksama:
«Jamu daviałosia pasiadzieć z kileram». Žonka žurnalista Andreja Kuźniečyka raskazała pra spatkańnie ź im
«My vyjdziem ščylnymi radami». Padrabiaznaści taho, što adbyvajecca na pracesie Aŭtuchoviča, uražvajuć i vymušajuć zadumacca
