Vynajšli preparat ad raku z absalutnaj efiektyŭnaściu. Rak pramoj kiški prosta źnik paśla ekśpierymientalnaha lačeńnia
Hrupa ludziej z rakam pramoj kiški pieražyła niešta nakštałt cudu: ich rak prosta źnik paśla ekśpierymientalnaha lačeńnia.
Krynica: pix4free.org
U nievialikim daśledavańni, praviedzienym lekarami Ńju-Jorkskaha ankałahičnaha centra Memorial Sloan Kettering, pacyjenty prymali preparat pad nazvaj dostarlimab na praciahu šaści miesiacaŭ. U vyniku vyprabavańniaŭ usie jany vylečylisia.
U testavaj hrupie było 18 čałaviek, i jašče šmat što treba budzie daviedacca pra toje, jak spracavała lačeńnie. Ale niekatoryja navukoŭcy kažuć, što padobnych vynikaŭ nikoli nie było ŭ historyi daśledavańniaŭ raku.
Doktar Channa Sanaf z kompleksnaha ankałahičnaha centra Łajnbierhierskaha Univiersiteta raskazała pra vyniki ekśpierymientu:
«Ja nievierahodna aptymistyčna nastrojenaja. My nikoli nie bačyli, kab niešta pracavała ŭ sta adsotkaŭ ludziej padčas lačeńnia raku.
Hety preparat adnosicca da kłasa preparataŭ, zvanych inhibitarami imunnych kantrolnych kropak. Jany vykarystoŭvajucca dla imunaterapii i dziejničajuć nie šlacham pramoha ŭździejańnia na sam rak, a faktyčna prymušajuć imunnuju sistemu čałavieka vykonvać asnoŭnuju pracu. Jany ŭžo davoli daŭno prymianiajucca pry miełanomie i inšych vidach raka, ale da niadaŭniaha času nie byli častkaj lačeńnia kałarektalnaha raku.
U bolšaści ludziej naohuł nie było surjoznych pabočnych efiektaŭ.
My spadziajomsia, što dla hetaj padhrupy ludziej, jakaja składaje ŭsiaho ad piaci da 10 adsotkaŭ ludziej, jakija pakutujuć na rak pramoj kiški, kali jany zmohuć praciahvać i prosta atrymlivać šeść miesiacaŭ imunaterapii i vylečycca — ja navat nie viedaju, jakoje słova vykarystoŭvać. Heta absalutnaja źmiena paradyhmy.
Pry raku pramoj kiški my kažam pacyjentu, kali stavim dyjahnaz: «my vielmi spadziajomsia, što zdolejem vylečyć vas, ale, na žal, my viedajem, što paśla lačeńnia vaša žyćcio mocna źmienicca».
U mianie byli pacyjenty, jakija paśla pieraniesienaha raku pramoj kiški amal nie vychodzili z chaty na praciahu mnohich hadoŭ, a ŭ niekalkich vypadkach navat dziesiacihodździaŭ, z-za nastupstvaŭ nietrymańnia mačy i źviazanaha z hetym soramu.
Ja sapraŭdy chacieła by, kab my praviali bolš maštabnaje daśledavańnie, u jakim hety preparat vykarystoŭvaŭsia b u značna bolš raznastajnych umovach, kab zrazumieć, jakaja budzie realnaja, praŭdzivaja častata adkazaŭ. Bo ja amal peŭnaja, što litaralna 100 adsotkaŭ vynik być nie moža, ale, kali tak atrymajecca, to budzie nievierahodna».
