Sud pakinuŭ bieź źmienaŭ prysud Palinie Šarendzie-Panasiuk
Žančyna musiła vyjści na volu ŭžo ŭ vieraśni hetaha hoda, ale joj dadali jašče adzin hod kałonii.
8 červienia Palina pasprabavała asprečyć hetaje rašeńnie ŭ Homielskim abłasnym sudzie, ale rašeńnie suda pieršaj instancyi zastałosia bieź źmienaŭ.
«Na žal, cuda nie adbyłosia, Palinie pryjdziecca adbyć jašče adzin hod źniavoleńnia. Niadaŭna atrymaŭ ad jaje list, maja žonka trymajecca hodna, prysud uspryniała z uśmieškaj, jana dziakuje ŭsim za padtrymku, i kaža, što tolki naša poŭnaja pieramoha vyzvalić jaje i astatnich palitviaźniaŭ», — skazaŭ «Biełsatu» muž Paliny Andrej Šarenda.
Da dadatkovaha hoda kałonii žančynu 7 krasavika pryhavaryŭ sudździa suda Čyhunačnaha rajona Homiela Mikałaj Krupadzioraŭ. Palinie inkryminavali «złosnaje niepadparadkavańnie patrabavańniam administracyi papraŭčaj ustanovy».
Palina Šarenda-Panasiuk była zatrymanaja ŭ studzieni 2021 hoda. Na jaje zaviali try kryminalnyja spravy: pavodle art. 364 KK («Hvałt albo pahroza vykarystańnia hvałtu ŭ dačynieńni da supracoŭnika orhanaŭ unutranych spravaŭ»), art. 368 («Abraza prezidenta») i art. 369 («Abraza pradstaŭnika ŭłady»). Usiaho paciarpiełymi pa spravie prachodzili siem milicyjanieraŭ. Pavodle viersii abvinavačvańnia, jana plunuła i ŭdaryła adnaho ź milicyjantaŭ padčas ahladu, a ź inšaha sarvała masku, astatnich abražała. Taksama žančyna nibyta dapuściła abrazu Łukašenki. Tady jaje asudzili na dva hady kałonii.
