Rakietny ŭdar RF pa Kijevie, vierahodna, byŭ sprobaj sarvać pastaŭki zachodniaj zbroi — raźviedka Brytanii
Rasijskaja rakietnaja ataka na Kijeŭ u niadzielu ranicaj, imavierna, była sprobaj sarvać pastaŭki Zachodniaj vajskovaj techniki. Pra heta havorycca ŭ ahladzie Minabarony Brytanii, datavanym paniadziełkam, paviedamlaje «Jeŭrapiejskaja praŭda».
«Ranicaj 5 červienia rasijskija kryłatyja rakiety pavietranaha bazavańnia Ch-101 nanieśli ŭdar pa čyhunačnaj infrastruktury, vierahodna, sprabujučy sarvać pastaŭki Zachodniaj vajskovaj techniki ŭkrainskim padraździaleńniam na pieradavoj», — havorycca ŭ ahladzie.
Adnosna padziej na Danbasie, vyviedka Brytanii adznačaje žorstkija bai ŭ Sievieradaniecku i prasoŭvańnie rasijskich vojskaŭ u Słaviansk u ramkach sprob akružyć ukrainskija siły.
Pa situacyi na mory: paśla straty krejsiera «Maskva» ŭ krasaviku rasijskija siły, vierahodna, pierakinuli na vostraŭ Źmiainy ŭ zachodniaj častcy Čornaha mora niekalki srodkaŭ supraćpavietranaj abarony, u tym liku sistemy SA-15 i SA-22 (ZRK Tor i ZRPK Pancyr — S1. — Red.).
Vierahodna, hetaja zbroja pryznačanaja dla supraćpavietranaj abarony rasijskich vajskovych karabloŭ, jakija dziejničajuć u rajonie vostrava Źmiainy, adznačajecca ŭ ahladzie.
Aktyŭnaść Rasii na vostravie Źmiainy spryjaje błakadzie ŭkrainskaha ŭźbiarežža i pieraškadžaje adnaŭleńniu marskoha handlu, u pryvatnaści, ekspartu ŭkrainskaha zbožža, ličyć brytanskaja raźviedka.
