Makiej paskardziŭsia na polskuju pamiežnuju ścianu ŭ JUNIESKA
Ministr zamiežnych spraŭ Biełarusi Uładzimir Makiej źviarnuŭsia da kiraŭnikoŭ nacyjanalnych kamisij pa spravach JUNIESKA zamiežnych krain i vykazaŭ krajniuju zaniepakojenaść u suviazi z budaŭnictvam Polščaj pamiežnaj ściany na terytoryi Biełaviežskaj puščy, paviedamili ŭ efiry STB.
Fota: Tvitar Polskaj pamiežnaj varty
Pa słovach Makieja, budaŭnictva płota pahražaje surjoznymi i niepaźbiežnymi nastupstvami. Na miažy, dzie polski bok uzvodzić aharodžu, užo, maŭlaŭ, zafiksavanyja šmatlikija fakty hibieli žyvioł, nahadaŭ Makiej i vykazaŭ mierkavańnie, što ŭ budučyni ich kolkaść ŭzraście.
«Biełaruś zaklikaje Polšču spynić budaŭnictva ściany na terytoryi abjekta Suśvietnaj spadčyny i źviartajecca da mižnarodnaj supolnaści z prośbaj padtrymać pazicyju aficyjnaha Minska ŭ hetym pytańni», — havorycca ŭ paviedamleńni.
Makiej taksama zajaviŭ, što, niahledziačy na nieadnarazovyja zapyty Biełarusi, Polšča da hetaha času tak i nie padała infarmacyju pra detali budaŭnictva ściany i acenku jaje ŭździejańnia na Biełaviežskuju pušču.
Na jahonuju dumku, havorka idzie pra biesprecedentnaje parušeńnie Polščaj pałažeńniaŭ Kanviencyi ab achovie suśvietnaj kulturnaj i pryrodnaj spadčyny, zhodna ź jakoj dziaržavie-ŭdzielnicy varta prymać usie nieabchodnyja miery dla zabieśpiačeńnia achovy i zachavańnia kulturnaj i pryrodnaj spadčyny, raźmieščanaj na jaje terytoryi.
Polšča prystupiła da ŭźviadzieńnia aharodžy na miažy ź Biełaruśsiu ŭ studzieni. Płot ujaŭlaje saboj masiŭnuju zaharadžalnuju kanstrukcyju ź bietonu i mietału na polska-biełaruskaj miažy, jon budzie mieć daŭžyniu 186 km i vyšyniu 5,5 mietra.
Budaŭnictva aharodžy źviazanaje ź nieabchodnaściu supraćstajańnia mihracyjnamu kryzisu, štučna arhanizavanamu biełaruskimi ŭładami ŭ 2021 hodzie z metaj palityčnaha cisku na zachodnija krainy.
Čytajcie taksama:
Polskija pamiežniki pakazali, jak ciapier vyhladaje płot na miažy ź Biełaruśsiu
