Bolš za dziasiatak abraz i pahroz na adras Łukašenki, sudździ i supracoŭnikaŭ milicyi. Jak sudziać chvoraha na rak Paŭła Kučynskaha
Sud Vilejskaha rajona pačaŭ razhlad kryminalnaj spravy žychara Maładziečna, palitviaźnia Paŭła Kučynskaha, piša «Viasna».
Spravu razhladaje sudździa Kanstancin Kaladaŭ, dziaržabvinavaŭca — namieśnik prakurora rajona Andrej Žukoŭski.
Palitźniavolenaha Paŭła Kučynskaha zatrymali 26 studzienia 2022 hoda i da suda źmiaścili ŭ śledčuju turmu ŭ Žodzinie, pry hetym jon maje invalidnaść druhoj hrupy, u jaho čaćviortaja stadyja raku.
Spačatku rodnym kazali, što Pavieł zatrymany na troje sutak, a paśla vyśvietliłasia, što jaho buduć trymać pad vartaj da suda. Rodnyja jeździli ŭ Baraŭlany za papierami, što jamu nieabchodnaje lačeńnie, pastajannyja abśledavańni i jaho nielha trymać u takich umovach, pisali ŭ prakuraturu i Administracyju Łukašenki — ale ničoha nie dapamahło.
Svajakam udałosia dabicca, kab Kučynskaha zvazili ŭ Baraŭlany na abśledavańni, pa vynikach jakich bačna, što stan zdaroŭja Paŭła pahoršyŭsia, pačaŭsia zapalenčy praces. Kali maci pryviezła vyniki abśledavańnia śledačaj z prośbaj akazać dapamohu, taja skazała, što jon nibyta nie skardzicca i što rodnyja «hetymi dziejańniami zatrymlivajuć praces».
Kančatkova Kučynskaha abvinavačvajuć pa 5 artykułach Kryminalnaha kodeksa:
- art. 389 Kryminalnaha kodeksa (pahroza ŭ dačynieńni da sudździ abo narodnaha zasiadaciela);
- art. 369 Kryminalnaha kodeksa (abraza pradstaŭnika ŭłady);
- art. 364 Kryminalnaha kodeksa (hvałt albo pahroza ŭžyvańnia hvałtu ŭ dačynieńni da supracoŭnika orhanaŭ unutranych spraŭ);
- č. 1 art. 368 Kryminalnaha kodeksa (abraza prezidenta Respubliki Biełaruś);
- art. 391 Kryminalnaha kodeksa (abraza sudździ abo narodnaha zasiadaciela).
U spravie niekalki paciarpiełych sudździaŭ i pradstaŭnikoŭ ułady: Łukašenka, Filistovič, Biedunkievič, Kachanoŭskaja i Pryhara.
Pa materyjałach abvinavačańnia, Pavieł Kučynski 30 maja 2021 hoda, majučy namier na publičnuju abrazu prezidenta Biełarusi, z vykarystańniem mabilnaha telefona raźmiaściŭ u telehram-čacie «Maładziečna. Žyćcio dla.Čat» raźmiaściŭ niehatyŭny kamientaryj z vykarystańniem nienarmatyŭnaj formy maŭlenčaha vykazvańnia. U toj ža dzień, u tym ža telehram-kanale abraziŭ pradstaŭnika ŭłady, sudździu Maładziečanskaha rajona Inu Kachanoŭskuju.
2 lipienia 2021 hoda ŭ źniavažlivaj formie publična abraziŭ načalnika RAUS Maładziečanskaha rajona Vadzima Pryharu, pryčyniŭ jamu maralnyja pakuty, pryniziŭ aŭtarytet supracoŭnika milicyi. Z pomsty za jahonuju słužbovuju dziejnaść taksama raźmiaściŭ pahrozy prymianieńnia hvałtu ŭ dačynieńni da supracoŭnika ŭnutranych spraŭ.
Jašče adzin epizod tyčycca raźmiaščeńnia kamientaryja z pahrozami hvałtu na adras sudździ Iny Kachanoŭskaj.
Abraźlivyja kamientaryi Kučynski pakidaŭ u maładziečanskim telehram-kanale «Maładziečna. Čat» u lipieni 2021 hoda šeść razoŭ. Aproč abrazy Łukašenki, Vadzima Pryhary i Iny Kachanoŭskaj, dapuskaŭ abrazy pamočnika kamandzira ŭzvoda PPS Maładziečanskaha rajona Filistoviča i namieśnika načalnika HUBAZ Biedunkieviča.
Usiaho ŭ spravie bolš za 10 epizodaŭ naniasieńnia abraz paciarpiełym, ździejśnienych ź lipienia pa kastryčnik 2021 hoda.
U sud byli vyklikanyja śviedki — maci Paŭła Žarovina i svajačka Skapiec, jakija admovilisia davać pakazańni suprać blizkaha čałavieka. U toj ža čas u jakaści śviedki zajaviŭ siabie dziadula Paŭła Ivan Kučynski.
Kučynski svaju vinu pryznaŭ u poŭnym abjomie.
U sudzie dziaržabvinavaŭcam było zajaŭlenaje chadajnictva praciahvać sudovaje pasiadžeńnie ŭ zakrytym režymie, pakolki mohuć być ahałošanyja piersanalnyja danyja ŭdzielnikaŭ pracesu, a taksama ahučanyja źviestki jakija prynižajuć udzielnikaŭ pracesu — paciarpiełych.
Paśla pierapynku sud padtrymaŭ chadajnictva. Dalej pasiadžeńnie prachodzić u zakrytym režymie.
