U časopisie «Mastactva» — praciah «aptymizacyi», jašče dva zvalnieńni
Z 1 červienia ŭ vydańni nie pracujuć redaktarka adździeła sučasnaha mastactva Alesia Bielaviec i viarstalnica Aksana Kartašova. Im prapanavali padpisać zajavy ab zvalnieńni pa zhodzie bakoŭ, paviedamlajuć krynicy Reform.by.
Raniej u ŚMI prachodziła infarmacyja ab zvalnieńni z «Mastactva» viadomaj biełaruskaj žurnalistki i baletnaha krytyka, maci hałoŭnaha redaktara «Našaj Nivy» Jahora Marcinoviča, — Taćciany Mušynskaj.
Redaktarku adździeła muzyki — pasada, na jakoj pracavała Taćciana Mušynskaja — paprasili syści pa padobnaj schiemie — napisać zajavu ab zvalnieńni pa zhodzie bakoŭ. Dalej takim čynam «syšli» inšych supracoŭnikaŭ «Mastactva».
Akramia taho, tych niamnohich žurnalistaŭ časopisa, što zastalisia, pieraviali na pałovu ci čverć staŭki, spasłaŭšysia na «ekanamičnyja abstaviny».
Padobnyja zachady pa «aptymizacyi» vydańnia zakranuli i hazietu «Kultura», jakaja razam z «Mastactvam» uvachodzić u chołdynh «Kultura i mastactva». U «Kultury» na miziernuju «čverć» pieraviali ci «syšli» pa viadomaj schiemie i stałych supracoŭnikaŭ redakcyi, jakija pracavali ŭ haziecie na praciahu mnohich hadoŭ.
Na dadzieny momant viadoma pra try zvalnieńni ŭ «Kultury» za apošni tydzień.
Čytajcie taksama:
Taćcianu Mušynskuju zvolnili z časopisa «Mastactva»
