Ratavalnikaŭ chočuć uzbroić i vykarystoŭvać suprać unutranych i źniešnich vorahaŭ
Biełaruskich ratavalnikaŭ zmohuć pryciahvać da vyrašeńnia «prablem, źviazanych z masavymi biesparadkami» i «ŭ intaresach Minabarony». Da siaredziny červienia ich zabiaśpiečać tabielnaj zbrojaj. Pra heta ŭ efiry telekanała STV paviedamiŭ kiraŭnik MNS Biełarusi Vadzim Siniaŭski, piša reform.by.
Pavodle słoŭ ministra, nieabchodnaść padrychtoŭki biełaruskich ratavalnikaŭ dla dziejańniaŭ u asablivych umovach vyznačyŭ Alaksandr Łukašenka.
«Pieršaje — heta ŭnutranyja prablemy — prablemy, źviazanyja z masavymi biesparadkami. Tamu ŭ intaresach orhanaŭ unutranych spraŭ my budziem vyrašać hetuju zadaču. U vypadku ŭzbrojenaha kanfliktu i ahresii ŭ dačynieńni da našaj krainy — u intaresach Ministerstva abarony», — raskazaŭ ministr, dadaŭšy, što padrychtoŭka padraździaleńniaŭ MNS dla pracy pa hetych napramkach užo idzie.
Jon taksama paviedamiŭ, što pastaŭlena zadača zrabić nieabchodnaje ŭzbrajeńnie asabistaha składu tabielnaj zbrojaj.
«Da 15 červienia my atrymlivajem uzbrajeńnie ŭ Ministerstvie abarony i faktyčna budziem hatovyja da vykanańnia zadač, jakija stajać pa pryznačeńni ŭ hetym siehmiencie pracy MNS», — skazaŭ jon.
Zaraz unosiacca źmianieńni ŭ prahramu padrychtoŭki kursantaŭ Univiersiteta hramadzianskaj abarony, jakija buduć prachodzić adpaviednuju padrychtoŭku.
«Ale ja chacieŭ by ahavarycca: my budziem vykonvać zadaču pry ŭźniknieńni asablivych umoŭ. Heta važny klučavy momant. Tamu što vielmi šmat z hetaj nahody mierkavańniaŭ, da nas pastupajuć roznyja zvaroty. Ščyra kažučy, i našyja rabotniki byli ŭschvalavanyja: a jak my budziem vykonvać hetuju pracu? Ale kali jany akunulisia ŭ praces padrychtoŭki — usio stała na svaje miescy. Usie vydatna razumiejuć čamu, kali i pry jakich umovach my budziem zajmacca hetaj pracaj, — zajaviŭ ministr. — Čym lepš my budziem hatovyja, tym mienš budzie mahčymaściaŭ u našych niadobrazyčliŭcaŭ pasprabavać vyprabavać čarhovy raz biełaruskaje hramadstva na tryvałaść».
