Kiraŭnik UPC mitrapalit Anufryj zhadaŭ patryjarcha Kiryła jak kiraŭnik aŭtakiefalnaj Carkvy. Ale jość niuansy
Kiraŭnik Ukrainskaj pravasłaŭnaj carkvy mitrapalit Anufryj padčas niadzielnaj słužby zhadaŭ patryjarcha Kiryła sposabam, pryniatym dla kiraŭnikoŭ aŭtakiefalnych (niezaležnych) cerkvaŭ. Pieraličvajučy ŭ malitvie kiraŭnikoŭ pravasłaŭnych cerkvaŭ, jon nazvaŭ patryjarcha Kiryła trecim — paśla patryjarchaŭ Antyjachijskaha i Ijerusalimskaha — i prapuściŭ pryniatuju raniej va UPC farmuloŭku «vialikaha haspadara i ajca našaha».
Ukrainskaja pravasłaŭnaja carkva da vajny farmalna padparadkoŭvałasia patryjarchu Maskoŭskamu Kiryłu. Adnak paśla pačatku poŭnamaštabnaha ŭvarvańnia Rasii va Ukrainu mnohija ŭkrainskija śviatary admovilisia paminać Kiryła padčas carkoŭnych słužbaŭ, pakolki jon nie tolki nie asudziŭ uvarvańnie, ale faktyčna jaho i padtrymaŭ.
U piatnicu ŭdzielniki Sabora Ukrainskaj pravasłaŭnaj carkvy vykazali niazhodu z pazicyjaj maskoŭskaha patryjarcha Kiryła i ŭnieśli źmieny ŭ svoj statut, jakija zamacoŭvajuć jaje «poŭnuju samastojnaść i niezaležnaść».
Na asnovie apublikavanaha UPC dakumienta nielha śćviardžać, što hetaja Carkva sapraŭdy abviaściła niezaležnaść. Ale dziejańni mitrapalita Anufryja ŭ hetuju niadzielu mohuć kazać pra toje, u jakim kirunku ruchajecca UPC.
Praŭda, pry hetym pakul što zachoŭvajecca razryŭ adnosin z tymi Cerkvami, jakija pryznali aŭtakiefaliju Pravasłaŭnaj carkvy Ukrainy, kankuretnaj Ukrainskaj pravasłaŭnaj carkvie.
U tym dyptychu, jakim karystaŭsia mitrapalit Anufryj, nie zhadvalisia Suśvietny (Kanstancinopalski) patryjarch i kiraŭniki troch Cerkvaŭ, jakija pryznali PCU, — Eładskaj, Aleksandryjskaj i Kiprskaj.
U suviazi z hetym namieśnik kiraŭnika Upraŭleńnia źniešnich carkoŭnych suviaziaŭ PCU Jeŭstracij (Zora) ličyć, što UPC zastajecca ŭ jurysdykcyi Maskoŭskaha patryjarchata, a demarš Anufryja — prosta «dymavaja zasłona».
«Heta značyć, Kiryła — błasłaviciela zabojcaŭ — jon paminaje, a Varfałamieja, jaki molicca za Ukrainu, — nie. Na samaj spravie — heta sposab zavualavać praciah paminańnia Kiryła.
Nijakaja heta nie aŭtakiefalija — heta prosta dymavaja zasłona. Mitrapalit Uładzimir u 2011 hodzie hetak ža sama paminaŭ — tady taksama była aŭtakiefalija?» — napisaŭ Jeŭstracij u Facebook.