Adzin z bankaŭ RB zamaroziŭ amal $30 miljonaŭ na rachunkach EPAM. Kampanija źmianiła bank
EPAM apublikavaŭ padrabiaznuju kvartalnuju spravazdaču dla Kamisii pa kaštoŭnych papierach i biržach ZŠA. U joj jość cikavaja infarmacyja ab pracy kampanii ŭ Biełarusi. EPAM da krasavika nie moh atrymać dostup da svaich hrošaj ($28,9 młn) u adnym ź biełaruskich bankaŭ — praz «administracyjnuju pravierku». Akramia taho, kampanija aktyŭna praciahvaje rełakiejt supracoŭnikaŭ, piša Dev.by.
«Kampanija maje hrašovyja srodki ŭ niekatorych krainach, uklučajučy Rasiju, Ukrainu i Biełaruś, na jakija paŭpłyvała ŭvarvańnie va Ukrainu.
Pa stanie na 31 sakavika 2022 hoda ŭ kampanii było $59,5 młn hrašovych srodkaŭ i ich ekvivalentaŭ u bankach Rasii, $51,0 młn — u bankach Biełarusi i $28,3 młn — u bankach Ukrainy.
Akramia taho, pa stanie na 31 sakavika 2022 h. u kampanii było dadatkova $28,9 młn u banku ŭ Biełarusi, dostup da jakich byŭ niemahčymy z-za administracyjnaj pravierki z boku banka.
Hetyja srodki byli pradastaŭlenyja EPAM całkam na praciahu krasavika, i amal usie jany byli pieraviedzienyja ŭ inšy bank u Biełarusi», — skazana ŭ spravazdačy.
Pra jaki bank i pra jakuju administracyjnuju pravierku idzie havorka — nieviadoma. U EPAM paviedamili dev.by, što «nie kamientujuć aśpiekty finansavaj dziejnaści».
Viadoma, što ŭvosień 2021 hoda EPAM trymaŭ u bankach Biełarusi $65,3 młn.
U spravazdačy taksama havorycca, što EPAM aktyvizavaŭ płan rełakiejtu supracoŭnikaŭ z Ukrainy, Biełarusi i Rasii.
«My spadziavajemsia praciahnuć pracu ŭ Biełarusi, pakul budzie vykonvacca śpiecyjalny płan bieśpierapynnaści biznesu (Belarus-specific business continuity plans). Značnaja kolkaść našych supracoŭnikaŭ u Biełarusi i Rasii ŭžo rełakavanyja. My spadziajevamsia, što za miežy hetych krain budzie rełakavanaja značna bolšaja kolkaść supracoŭnikaŭ».
Z-za vajny ŭ EPAM uźnikli prablemy i z klijentami.
U pryvatnaści, «niekatoryja z klijentaŭ błakavali internet-złučeńnie z Rasijaj, Ukrainaj i Biełaruśsiu, kab abaranić siabie ad patencyjnych kibieratak i inšych pahroz dla infarmacyjnaj biaśpieki». Heta paŭpłyvała na mahčymaści EPAM pa dastaŭcy servisaŭ i pasłuh z hetych troch krain.
