Asablivy vyrašaje! «Roma» Žaze Muryńja pieramahła «Fiejenord» i stała pieršym u historyi kłubam — tryŭmfataram Lihi Kanfierencyj
Italjanskija «vaŭki» zahryźli apanientaŭ ź Niderłandaŭ — i stali pieršymi ŭ historyi pieramožcami futbolnaj Lihi Kanfierencyj. A nastaŭnik rymlan Žaze Muryńja, jaki nikoli ŭ karjery nie sastupaŭ u finałach jeŭrakubkaŭ, znoŭ pryvioŭ padnačalenych da trafieja.
Italjanskaja «Roma» zavajavała pieršy trafiej u najnoŭšaj historyi. Fota: Uefa.com
Słavić nastaŭnika «Romy», mahčyma, nie samaja hodnaja situacyja. U nacyjanalnym pieršynstvie futbalisty ź italjanskaj stalicy zaniali tolki šostaje miesca. Tamu mahija Žaze Muryńja jak śled u ramkach sieryi «A» nie spracavała. Tym nie mienš, Asablivy (užo kolki hadoŭ treniera tak nazyvajuć zaŭziatary i žurnalisty) zdoleŭ-taki dakazać svaju admietnaść praz revanš na mižnarodnaj arenie.
Čałaviek, jaki tryumfavaŭ u Lizie Čempijonaŭ z «Portu» dy «Interam», a taksama braŭ hałoŭny trafiej Lihi Jeŭropy z «Portu» i «Mančester Junajted», dadaŭ da kalekcyi i zołata Lihi Kanferencyj. Takim čynam, śpiecyjalist staŭ pieršym u historyi čałaviekam, jaki pieramoh va ŭsich troch kłubnych turnirach pad ehidaj UEFA, što isnujuć u sučasnaści. A taksama staŭ adzinym, chto zdabyŭ jeŭrapiejskija kubki na čale ažno čatyroch kamandaŭ!
⚽ Jose 'The Special One' Mourinho has done it again
2x Champions League
1x UEFA cup
1x Europa League
3x Premier League Winner
1x Spanish LaLiga Winner
2x Sería A Winner
Just simply Jose pic.twitter.com/5xWgTbjphY
Da taho ž Muryńja i novuju staronku ŭ kłubnuju historyju ŭpisaŭ. Raniej «Romie» skaraŭsia tolki Kubak Kirmašoŭ, ale heta było, jak kažuć, daŭno i niapraŭda. U najnoŭšych ža realijach «vaŭki» vyli ad sumu što paśla finała Kubka jeŭrapiejskich čempijonaŭ-1984, što paśla vyrašalnaj sustrečy Kubka UEFA-1991.
Sastupi rymlanie jašče ŭ adnym trafiejnym zmahańni — i možna było b kazać pra ŭtvareńnie futbolnaha kompleksa. Adnak trapny streł na 23-j chvilinie Dzańjoła (paŭabaroncy, što ŭ 2020-m dvojčy rvaŭ źviazki kalena, ale viarnuŭsia ŭ futboł) pazbaviŭ italjancaŭ i ich tyfozi ad nieabchodnaści źviartacca da psichołahaŭ.
Nikoła Dzańjoła robić «Romu» pieramožcam Lihi Kanfierencyj. Fota: Uefa.com
Ź inšaha boku, paciarpieŭ mientalny stan hulcoŭ «Fiejenorda». Bo samaja vynikovaja kamanda turnira i ŭ finalnym dvuboi stvaryła bieźlič halavych momantaŭ. Voś tolki bronzavaha pryziora pieršynstva Niderłandaŭ padviała realizacyja: ledź nie kožny pradstaŭnik hrupy ataki mieŭ mahčymaść zasmucić Patrysiu, adnak u «momant iks» sastupaŭ bramniku ŭ zmahańni. Kali ž i partuhalec, na rachunku jakoha ažno piać sejvaŭ za viečar, pasavaŭ, jamu na dapamohu prychodzili belka albo štanha.
U vyniku kamanda, što prajšła biez paraz usiu turnirnuju dystancyju, addała supierniku Kubak z-za adzinaj pamyłki abarony na ŭvieś finał…
Samaja vynikovaja kamanda turnira, «Fiejenord», tak i nie zdoleła chacia b adnojčy zasmucić italjancaŭ. «Fota: Uefa.com
Muryńja hetaj pamyłki, biezumoŭna, čakaŭ. A dalej rabiŭ usio, kab z dapamohaj svajho najbahaciejšaha vopytu «zakansiervavać» pazityŭny vynik. Tak jon dziejničaŭ u finałach jeŭrakubkaŭ raniej — i vybiŭ čatyry pazityŭnyja vyniki z čatyroch.
Historyja 2022-ha tolki paćvierdziła praviła: kali Žaze prybiraje da ruk kantrol situacyi ŭ vyrašalnym dvuboi, nichto jamu ŭžo nie zaminie. Takim ža čynam, darečy, u svaje časy dziejničali kamandy lehiendarnaha Džavani Trapatoni. Viečaram sierady Muryńja paŭtaryŭ nie tolki patern dziejaŭ kultavaha treniera, ale i jaho dasiahnieńnie. Na rachunku partuhalca, jak i Trapa, stała piać kantynientalnych trafiejaŭ.
