Reuters: Za «mirnyja pieramovy i nieadkładnaje spynieńnie ahniu» vystupajuć Italija, Vienhryja i Kipr
Italija i Vienhryja paprasili Jeŭrasajuz zaklikać da spynieńnia ahniu ŭ Ukrainie i mirnym pieramovam z Rasijaj. Jak piša Reuters, takim čynam jany supraćpastavili siabie inšym krainam Jeŭrasajuza, jakija majuć namier zaniać žorstkuju liniju ŭ dačynieńni da Maskvy napiaredadni samitu, jaki adbudziecca na nastupnym tydni.
U prajekcie zaklučnaj zajavy da samitu 30—31 maja, ź jakim aznajomiłasia Reuters i jaki datavany 19 maja, havorycca, što Jeŭrasajuz «niepachisny ŭ svaim abaviazańni dapamahčy Ukrainie ažyćciavić jaje nieadjemnaje prava na samaabaronu suprać rasijskaj ahresii». U im nie zhadvajucca mirnyja pieramovy.
Na sustrečy pasłańnikaŭ ES u piatnicu, pa słovach prysutnych asob, pasoł Italii prapanavaŭ unieści źmieny ŭ tekst, skazaŭšy, što ŭ im pavinna ŭtrymlivacca spasyłka na mirnyja pieramovy i nieadkładnaje spynieńnie ahniu jak adna ź pieršych metaŭ Jeŭrasajuza.
Heta prapanova była padtrymana Vienhryjaj i Kipram — dziaržavami, najbolš krytyčna nastrojenymi ŭ dačynieńni da novaha pakieta sankcyj JEZ suprać Rasiei, jaki ŭžo niekalki tydniaŭ błakujecca z-za ŭnutranych roznahałośsiaŭ.
Vienhryja vystupaje suprać płanavanaha naftavaha embarha, a Kipr zaniepakojeny prapanavanaj zabaronaj na prodaž nieruchomaści rasijskim hramadzianam.
Staršynia Jeŭrakamisii Ursuła fon der Lajen, vystupajučy ŭ aŭtorak na forumie ŭ Davosie, zaniała žorstkuju pazicyju ŭ dačynieńni da Rasii i nie zhadała pra mirnyja pieramovy.
«Ukraina pavinna vyjhrać hetuju vajnu, a ahresija Pucina pavinna stać stratehičnym pravałam», — skazała jana.
U apošnim prajekcie vysnovaŭ samitu havorycca, što ES «pa-raniejšamu prychilnaja ŭmacavańniu zdolnaści Ukrainy abaraniać svaju terytaryjalnuju cełasnaść i suvierenitet».
Sa słoŭ dypłamataŭ, krainy Bałtyi i Polšča źjaŭlajucca adnymi z najmacniejšych prychilnikaŭ žorstkaj linii, a Łatvija patrabuje jašče bolš vyraznaj farmuloŭki pavieličeńnia vajskovaj padtrymki. Pierahledžany prajekt pavinien być pradstaŭleny siońnia paśla sustrečy pasłańnikaŭ ES, skazaŭ adzin z dypłamataŭ.
Na minułym tydni Italija prapanavała mirny płan, jaki praduhledžvaje ŭdzieł AAN, ES i ABSIE ŭ jakaści pasiarednikaŭ dla pieršapačatkovaj arhanizacyi spynieńnia ahniu na miescach.
