«Spačatku kazali pra časovaje prypynieńnie pracy, a potym usim prapanavali zvolnicca». Jak majecca Jysk?
Prajšło bolš za miesiac, jak sietka kramaŭ Jysk prypyniła pracu na niavyznačany termin. «Naša Niva» pacikaviłasia, što ciapier z supracoŭnikami i ci abmiarkoŭvajecca mahčymaje adkryćcio.
Fota: Myfin_news
U adnoj z kram raspaviadajuć, što pra časovaje prypynieńnie pracy z 18 krasavika im paviedamili zahadzia, paabiacaŭšy, što prynamsi za maj usie atrymajuć zarpłatu pa poŭnaj staŭcy.
«Bližej da zakryćcia płany źmianilisia. Spačatku nam stali kazać, što pieraviaduć na 0,25 staŭki, što zvalniać nie buduć, a budziem čahości čakać. Potym i heta ŭsio pamianiałasia.
Kramy prypynili pracu, pryjechaŭ dyrektar i prapanavaŭ usim zvolnicca pa pahadnieńni bakoŭ. Nam kazali: «Nu što tołku vam siadzieć? My vas usich pieraviadziom na 0,25 staŭki, ale jaki sens siadzieć i čakać nieviadoma čaho». Tamu nam prapanavali lepš zvolnicca pa pahadnieńni bakoŭ i atrymać u takim vypadku pa try zarpłaty ŭ jakaści kampiensacyi», — uspaminaje adna z supracoŭnic.
Pa jaje słovach, rabotniki kramy, dzie jana pracavała, tak i pastupili. Adnak kampiensacyju ŭ pamiery troch zarpłat atrymali nie ŭsie.
«Tym, u kaho ŭ bližejšy čas zakančvaŭsia kantrakt, prosta paviedamili, što jaho praciahvać nie buduć, tamu niekatoryja, užo byłyja supracoŭniki, zmahli atrymać tolki kampiensacyju za niavykarystany adpačynak».
Dziaŭčyna adznačaje, što niekatory čas paśla zakryćcia jany praciahvali chadzić na pracu, pakolki treba było razabracca z tymi reštkami tavaru, jakija zastalisia nieraspradadzienymi.
«Tavar, jaki zastaŭsia, z troch kramaŭ Minska źvieźli ŭ adnu. Nakolki mnie viadoma, u bližejšy čas kampanija płanuje adnavić pracu adnoj kramy, kab maksimalna pazbavicca ad reštkaŭ. Tamu nie vyklučaju, što prynamsi ŭ adnoj z troch kram niejkaja častka supracoŭnikaŭ dahetul zastałasia. Adnaŭleńnie pracy kramy ŭ Šabanach na čas niejkich rasprodažaŭ dakładna nie płanujecca».
Finalny rasprodaž, miarkujecca, budzie ŭ pieršaj pałovie červienia.
Naš druhi surazamoŭca pracuje ŭ Jysk na Kamiennaj horcy. Pa jaho słovach, navat paśla 18 krasavika častka rabotnikaŭ praciahvała pracavać u zvyčajnym režymie.
«Naša krama ŭ peŭnym sensie praciahvała pracu bieśpierapynna, bo treba było zajmacca pytańniami zvarotu tavaru i harantyjnych abaviazkaŭ. Naturalna, što dla takoha abjomu raboty spatrebiłasia tolki nievialikaja častka piersanału. Astatnich na miesiac adpravili ŭ sacyjalny adpačynak», — kaža mužčyna.
Pakul nieviadoma, što budzie z tymi, chto dahetul pracuje ŭ Jysk.
«Pakul ludziej u našaj kramie nie skaračajuć, ale jany sami pacichu sychodziać. Ciapier zvalniajucca tyja, chto ŭžo paśpieŭ znajści inšuju pracu ci prosta nie choča znachodzicca ŭ stanie niavyznačanaści. Zvalniajucca tolki pa asabistym žadańni, tamu nijakaj kampiensacyi nie atrymlivajuć.
Što budzie paśla finalnaha rasprodažu — nieviadoma. Bo heta tyja rašeńni, jaki prymajucca nie na minskim uzroŭni», — padsumavaŭ naš surazmoŭca.
Čytacie taksama:
Paśpieć u apošni vahon. Jak vyhladajuć kramy Jysk za niekalki hadzin da zakryćcia
