Kontrsankcyi Minska pa aŭtapieravozkach ź Jeŭrasajuza vyłaziać bokam u Kazachstanie
U Kazachstanie transpartniki zatrymlivajuć biełaruskija i rasijskija fury z hruzam, jaki pierazahruzili ŭ Biełarusi z mašyn Jeŭrasajuza. Pra heta paviedamlajuć Asacyjacyi mižnarodnych aŭtapieravozak Biełarusi i Rasii. Mašyny zastajucca ŭ Kazachstanie da taho času, pakul pieršapačatkovy pieravozčyk Jeŭrasajuza nie prybudzie ŭ hetuju krainu dla vyrašeńnia situacyi, piša Zerkalo.io.
Miaža Kazachstana. Fota: today.kz
Da takoj situacyi pryviali kontrsankcyi, jakija Biełaruś uviała ŭ krasaviku suprać jeŭrapiejskich aŭtamabilnych hruzapieravozčykaŭ. Udakładnim, što Kazachstan — naš «susied» pa JEAES.
Pry zatrymańni rasijskich i biełaruskich furaŭ Kazachstan spasyłajecca na svaje zakony. Kali koratka, to hetaja dziaržava nie dapuskaje ŭvozu hruzaŭ, jakija byli pieračeplenyja abo pierahružanyja ŭ trecich krainach. Za parušeńnie kiroŭca moža być aštrafavany.
Nahadajem, z 16 krasavika Biełaruś uviała kontrsankcyi suprać jeŭrapiejskich aŭtamabilnych hruzapieravozčykaŭ. Im možna tolki jechać u peŭnyja łahistyčnyja centry niedaloka ad miažy dla pierahruzu abo pieračeplivańnia.
Mienavita kontrsankcyi šmat u čym i spravakavali ciapierašniuju situacyju ŭ Kazachstanie z zatrymańniem biełaruskich i rasijskich furaŭ z hruzam, jaki pierazahruzili ŭ Biełarusi z mašyn Jeŭrasajuza.
Što kažuć biełaruskija pieravozčyki, jakija ŭžo jeździli ŭ Kazachstan z «pieračepami»
Biełaruskija pieravozčyki, jakija vieźli ŭ Kazachstan «pieračepy» ź ES, paviedamili, što mašyny zatrymlivalisia supracoŭnikami inśpiekcyi transpartnaha kantrolu Kazachstana. Ich trymali da taho času, pakul pieršapačatkovy pieravozčyk Jeŭrasajuza nie prybudzie ŭ Kazachstan dla razhladu raspačataj u dačynieńni da jaho spravy ab administracyjnym pravaparušeńni i nie pradjavić dazvoł na pieravozku.
Što ŭ hetaj situacyi prapanujuć transpartnyja «prafsajuzy»
Z-za hetych abmiežavańniaŭ Biełaruskaja asacyjacyja mižnarodnych aŭtapieravozčykaŭ (BAMAP) źviarnułasia ŭ Mintrans Biełarusi, kab jon abmierkavaŭ z kampietentnymi orhanami Kazachstana prapanovy pa ŭrehulavańni pytańniaŭ vykanańnia mižnarodnych aŭtamabilnych pieravozak. Takaja ž situacyja adbyvajecca i z rasijskimi pieravozčykami.
U rasijskaj Asacyjacyi mižnarodnych aŭtapieravozčykaŭ miarkujuć, što ŭ hetym vypadku Kazachstan parušaje niekatoryja damoŭlenaści. Havorka pra dvuchbakovaje pahadnieńnie ab mižnarodnym aŭtamabilnym spałučeńni.
Asacyjacyja prosić pieravozčykaŭ nie jechać u Kazachstan da vyśviatleńnia situacyi.
Trochi padrabiaźniej pra toje, jakija pretenzii ŭ Kazachstana (dla tych, chto choča pahłybicca ŭ detali)
Kazachstan ličyć, što zakryćcio pracedury mytnaha tranzitu ŭ pieravozčyka ź ES u śpiecyjalna ŭstanoŭlenych miescach i adkryćcio novaj pracedury mytnaha tranzitu ŭ biełaruskaha pieravozčyka nie aznačaje zaviaršeńnia tranzitu ŭ dačynieńni da zamiežnych tavaraŭ, jakija pieravoziacca. A heta značyć, što biełaruski pieravozčyk nie moža pieravozić hruz u Kazachstan jak nastupny pieravozčyk, navat kali jość dazvoł na pieravozku hruzaŭ u/z trecich krain.
U Kazachstanie ličać, što zaviaršeńnie pracedury mytnaha tranzitu praduhledžvaje praviadzieńnie z tavarami mytnych apieracyj — pieramiaščeńnie tavaraŭ na časovaje zachoŭvańnie abo ich mytnaje dekłaravańnie.
Bolš padrabiazna pra situacyju ŭ Kazachstanie z «pieračepami» ź Biełarusi možna pračytać na sajcie BAMAP.