HUBAZiK pachvaliŭsia zatrymańniem dvuch adminaŭ telehram-čataŭ. Raspaviadajem, chto jany
Dniami siłaviki anansavali zatrymańnie administrataraŭ telehram-kanałaŭ, «źviazanych z NEXTA».
U dzień zaviadzieńnia na administrataraŭ Nexta Ściapana Puciły i Jana Rudzika kryminalnaj spravy «za stvareńnie terarystyčnaj arhanizacyi» HUBAZiK zajaviŭ pra hučnuju śpiecapieracyju suprać antyłukašysckaha padpolla. My daviedalisia, chto hetyja ludzi.
Vadzim Vasiljeŭ. Fota: sacsietki
Pieršy ź ich — uradženiec Viciebska 27-hadovy Vadzim Vasiljeŭ. Na videa jon kaža, što byŭ administrataram čataŭ «Viciebsk 97%» i «Orša 97%» u žniŭni 2020 hoda, tady ich nabirali litaralna pa abjavach. Anijakich dokazaŭ jahonych «złačynstvaŭ» siłaviki nie pryvodziać.
Chłopiec pa prafiesii byŭ aśviatlalnikam šostaha razrada i akcioram teatra i kino. Navučaŭsia ŭ dźviuch ustanovach — Viciebskim dziaržaŭnym licei №5 pryborabudaŭnictva i Viciebskim dziaržaŭnym kaledžy kultury i mastactvaŭ.
Doŭhi čas jon pracavaŭ aśviatlalnikam u Biełaruskim teatry «Lalka» ŭ Viciebsku, a apošnim časam u Centry kultury «Viciebsk».
Alaksiej Žylanin. Fota: sacsietki
Druhi z chłopcaŭ — uradženiec Homiela 27-hadovy Alaksiej Žylanin. Na videa jon pryznajecca, što byccam by byŭ adnym z administrataraŭ čata «Homiel 97%» i byŭ nieadnarazova sudzimy.
Nasamreč, heta zroblena šlacham mantažu, havorka pra čat «Homiel — Vołatava 97%». Jon naličvaje ŭsiaho 41 padpisanta i nie maje amal anijakaj aktyŭnaści.
Alaksiej byŭ vosiem razoŭ asudžany pa palityčnym artykule 23.34 KoAP (parušeńnie paradku i praviadzieńnia masavych mierapryjemstvaŭ), dvojčy pa artykule 17.11 KoAP (raspaŭsiud ekstremisckich materyjałaŭ) i dvojčy pa artykule 339 KK (chulihanstva). Bolšaść artykułaŭ 23.34 — za ahitacyju ŭ čacie, u jakim jon byŭ administrataram, dla vielmi małoj aŭdytoryi.
Što datyčyć nibyta «chulihanstva», to jano źviazanaje z tym, što jon 26 kastryčnika 2020 hoda, u dzień abvieščanaj Cichanoŭskaj ahulnanacyjanalnaj zabastoŭki, vyviesiŭ bieł-čyrvona-bieły ściah na adnoj z daroh Homiela razam z pradmietam, padobnym da vybuchoŭki. Voś heta i interpretavali jak «chulihanstva».
Alaksiej mieŭ, vidać, ciažkaje dziacinstva. Jon byŭ raniej sudzimy — za sprobu skraści sumku ŭ mužčyny, kali byŭ u dziaviatym kłasie i paśla za bojku ź inšaziemnym studentam na prypynku. Jon pravioŭ niekalki hod spačatku ŭ dziciačaj vychavaŭčaj kałonii, a paśla ŭ kałonii dla darosłych.
