U Žodzinie syn śledčaha pieradaŭ Nexta kopiju słužbovaha dakumienta. Baćku zvolnili, a syna buduć sudzić
U studzieni 2022 hoda syn śledčaha Žodzinskaha haradskoha adździeła Śledčaha kamiteta ŭziaŭ u baćki kopiju słužbovaha dakumienta i pieradaŭ dakumient telehram-kanału Nexta, jaki byŭ pryznany ekstremisckim, a paźniej — i terarystyčnym farmavańniem.
Pavodle materyjałaŭ spravy, abvinavačany pieradaŭ administrataram Telegram-kanała Nexta kopiju słužbovaha dakumienta centralnaha aparata Śledčaha kamiteta ab uklučeńni cledčaha Žodzinskaha HOSK u skład hrupy pa rasśledavańni kryminalnaj spravy ŭ dačynieńni da Franaka Viačorki, Ramana Pratasieviča i inšych asob.
Nieŭzabavie chłopca i jaho baćku zatrymali. Praź niekatory čas cledčaha zvolnili z SK, a syna aryštavali. Jon dahetul zastajecca pad vartaj, jaho abvinavačvajuć pavodle č. 1 art. 361-4 (sadziejničańnie ekstremisckaj dziejnaści) Kryminalnaha kodeksa Biełarusi. Jamu pahražaje da šaści hadoŭ pazbaŭleńnia voli.
Hienprakuratura ŭžo pieradała kryminalnuju spravu ŭ sud.
Havorka idzie pra dakumient, jaki 16 studzienia apublikavaŭ u siabie na staroncy ŭ Fejsbuku Franak Viačorka. Ź jaho vynikaje, što Viačorka, a taksama Raman Pratasievič, Anton Matolka i Ściapan Puciła abvinavačvajucca albo padazrajucca pa dziesiaci artykułach Kryminalnaha kodeksa Biełarusi, piša Zerkalo.io
