Łukašenka zajaviŭ, što Rasija pradała jamu «Iskandery» i kompleksy S-400
Pra nibyta prodaž Rasijaj Biełarusi «Iskanderaŭ» i ZRK S-400 Łukašenka skazaŭ siońnia na sustrečy z hubiernataram Nižaharodskaj vobłaści.
Praŭda, zhadaŭ jon tolki pra sam fakt, a nijakich padrabiaznaściaŭ nie padaŭ. Navat pra kolkaść vykazaŭsia abciakalna: što jana «patrebnaja»:
«My kupili ŭ vas patrebnuju nam kolkaść hetych «Iskanderaŭ», S-400, uzbroili naša vojska. Ciapier heta ŭžo zusim inšaje vojska z takim uzbrajeńniem. Prynamsi nieprymalnuju škodu hetaja zbroja moža nanieści kałasalnuju».
Akramia taho, jon adznačyŭ, što rakiety aktyŭna stvarajucca i ŭłasnyja, pry dapamozie i sadziejańni Rasii:
«Z Pucinym abmiarkoŭvali prablemu rakietabudavańnia, — cytuje Łukašenku jahonaja pres-słužba. — Dapamohuć nam davieści da ładu novyja rakiety, jakija my stvarajem. My značna prasunulisia napierad, ale z rasijanami my chutčej stvorym narmalnuju rakietu — kampietencyj u ich bolš».
Maŭlaŭ, «kali razumny čałaviek pryjdzie i padkaža, što my nie tak robim, to da kanca hetaha hoda atrymajem užo rakietu typu «Iskander». A biez rasijan stvorać taksama, tolki času spatrebicca bolš za hod.
