Hałoŭny raźviedčyk Ukrainy: Pucin vielmi chvory, a vajna skončycca da kanca hoda
Kiraŭnik vajskovaj raźviedki Ukrainy, hienierał-major Kiryła Budanaŭ u ekskluziŭnym intervju vydańniu Sky News pradkazaŭ, što vajna va Ukrainie dasiahnie pavarotnaha momantu ŭ žniŭni i skončycca da kanca hoda. A taksama — što Pucin vielmi surjozna chvory, i ŭ Rasii ŭžo idzie paŭzučy dziaržaŭny pieravarot.
Hienierał Budanaŭ pravilna sprahnazavaŭ, kali adbudziecca rasijskaje ŭvarvańnie, kali inšyja va ŭkrainskim kiraŭnictvie byli publična skieptyčnymi. I ciapier jon kaža, što ŭpeŭnieny ŭ prahnazavańni jaje zaviaršeńnia.
«Pierałomny momant budzie ŭ druhoj pałovie žniŭnia. Bolšaść aktyŭnych bajavych dziejańniaŭ budzie zavieršana da kanca hetaha hoda. U vyniku my adnovim ukrainskuju ŭładu na ŭsich našych terytoryjach, jakija my stracili, uklučajučy Danbas i Krym», — śćviardžaje Budanaŭ.
Jon kaža, što nie ździŭleny niaŭdačami Rasii ŭ vajnie.
«My viedajem usio pra našaha voraha. My viedajem pra ich płany amal adrazu ž, jak jany strojacca. My zmahajemsia z Rasijaj užo vosiem hadoŭ, i my možam skazać, što hetaja šyroka razrekłamavanaja rasijskaja ŭłada źjaŭlajecca mifam. Heta nie tak mahutna, jak zdavałasia. Heta arda ludziej sa zbrojaj»…
Hienierał Budanaŭ taksama skazaŭ Sky News, što paraza va Ukrainie pryviadzie da likvidacyi rasijskaha lidara i raspadu krainy.
«Heta ŭ kančatkovym vyniku pryviadzie da źmieny kiraŭnictva Rasiejskaj Fiederacyi. Hety praces užo zapuščany, i jany ruchajucca takim čynam».
Pavodle słoŭ hałoŭnaha ŭkrainskaha raźviedčyka, Pucin znachodzicca ŭ vielmi kiepskim stanie:
«Adzinaje, što mahu skazać — my absalutna paćviardžajem, što jon znachodzicca nie ŭ vielmi dobrym psichaemacyjnym i fizijałahičnym płanie. Jon vielmi mocna chvory. U jaho adnačasova šmat surjoznych zachvorvańniaŭ, adno ź jakich — rak».
