«Nie bačym prykmiet padrychtoŭki da nastupleńnia». U Kijevie nie chvalujucca z-za pravierki sił reahavańnia ŭ Biełarusi
Pravierka sił reahavańnia Uzbrojenych siłaŭ Biełarusi nie vyklikaje chvalavańnia ŭkrainskich uładaŭ. Pra heta ŭ intervju kanała «Fiejhin Live» zajaviŭ daradca kiraŭnika Ofisa prezidenta Ukrainy Alaksiej Arastovič, piša «Zierkało».
— Heta płanavaja pravierka hatoŭnaści, i heta płanavaje vučeńnie biełaruskich uzbrojenych sił. (…) Nie bačym prykmiet padrychtoŭki da nastupleńnia na Ukrainu abo ŭvachodžańnia vojskaŭ va Ukrainu i asablivaj turboty nie adčuvajem, — skazaŭ Arastovič.
Na dumku savietnika, kali biełaruskija vojski nie prymali ŭdzieł u pieršym etapie rasijska-ŭkrainskaj vajny, to ciapier heta jašče mienš vierahodna.
— Tady ž było jak: voś Kijeŭ šturmujuć adbornyja rasijskija častki. A ciapier što?! Jany pojduć biez rasijskich častak? Absalutna nierealna. Ja nie baču nahody chvalavacca ciapier, ‒ dadaŭ Arastovič.
Daradca raspavioŭ, što, pavodle jaho danych, u Biełarusi zastajecca «dziasiatak-paŭtara» rasijskich samalotaŭ i niekalki taktyčnych rakietnych kompleksaŭ.
— Heta ŭsio nie nastupalnaja «pa ziamli» zbroja.
Učora ŭ Biełarusi pačaŭsia druhi etap raptoŭnaj pravierki sił reahavańnia. Pra heta zajaviŭ ministr abarony Viktar Chrenin 10 traŭnia paśla narady ŭ Łukašenki. Pavodle Minabarony, vajennaje mierapryjemstva było zapłanavanaje ŭ adkaz na vučeńni, jakija z 1 traŭnia prachodziać na terytoryi krain NATA.