Siejm Litvy pryznaŭ Rasiju terarystyčnaj dziaržavaj
Kramloŭski režym imkniecca źniščyć ukrainskuju nacyju, tamu takija dziejańni pavinny być pryznanyja hienacydam, a Rasija zjaŭlajecca dziaržavaj, jakaja padtrymlivaje i ažyćciaŭlaje teraryzm, pryznaŭ u aŭtorak parłamient Litvy, piša Delfi.
Fota: Delfi
Siejm adnahałosna prahałasavaŭ za adpaviednuju rezalucyju — 128 hałasoŭ. Parłamient kanstatavaŭ, što rasijskija ŭzbrojenyja siły ździejśnili masavyja vajennyja złačynstvy na terytoryi Ukrainy, u tym liku ŭ haradach Buča, Irpień, Maryupal, Baradzianka i Hastomiel. Zhodna z dakumientam, praduhledžvajecca meta poŭnaha abo častkovaha źniščeńnia ŭkrainskaj nacyi, jaje duchu šlacham zabojstva jaje členaŭ cełymi siemjami, u tym liku dziaciej, vykradańnie ich, katavańnie, zhvałtavańnie, u tym liku i niepaŭnaletnich, ździeki ź ciełaŭ zabitych i zakatavanych.
«Siejm Litvy pryznaje poŭnamaštabnuju ŭzbrojenuju ahresiju suprać Ukrainy z boku ŭzbrojenych sił Rasijskaj Fiederacyi i jaje palityčnaha i vajennaha kiraŭnictva, raspačatuju 24 lutaha 2022 hoda, hienacydam ukrainskaha naroda», — havorycca ŭ rezalucyi. U joj taksama padkreślivajecca, što ŭsie vinavatyja pavinny być pryciahnutyja da adkaznaści, i što mižnarodnaja supolnaść pavinna stvaryć Śpiecyjalny mižnarodny kryminalny trybunał dla rasśledavańnia i acenki ahresii Rasii suprać suvierennaj Ukrainy.
Siejm Litvy zaklikaje da taho, kab u hetaha trybunała byli paŭnamoctvy vydavać mižnarodnyja ordary na aryšt, i kab imunitetu nie mieli dziaržavy ci kiraŭniki dziaržaŭ i ŭradaŭ dy inšyja dziaržaŭnyja słužbovyja asoby.
«Rasijskaja Fiederacyja, uzbrojenyja siły jakoj śviadoma i sistematyčna vybirajuć hramadzianskija abjekty dla bambardzirovak, zjaŭlajecca dziaržavaj, jakaja padtrymlivaje i ažyćciaŭlaje teraryzm», — havorycca ŭ rezalucyi. Uvarvańnie Rasii va Ukrainu pryviało da hibieli tysiač mirnych žycharoŭ, razbureńnia hramadzianskaj infrastruktury, majucca paviedamleńni ab seksualnym hvałcie nad ukrainskimi žančynami i dziećmi, vykradańni ludziej i inšych złačynstvach.
