Barel zaklikaŭ pieradać Ukrainie zamarožanyja ŭ ES reziervy Rasii
Pa słovach pradstaŭnika ES pa zamiežnych spravach, krainam sajuza treba pa prykładzie ZŠA ŭ dačynieńni da CB Afhanistana skiravać zamarožanyja reziervy Rasii na adnaŭleńnie Ukrainy.
Aeradrom u Hastomieli pad Kijevam paśla vyzvaleńnia ad rasijskaj akupacyi.
Krainam Jeŭrasajuza nieabchodna razhledzieć pytańnie ab kanfiskacyi zamarožanych valutnych reziervaŭ Rasii, kab dapamahčy apłacić vydatki na adnaŭleńnie Ukrainy paśla kanfliktu. Pra heta ŭ intervju Financial Times zajaviŭ kiraŭnik dypłamatyi ES Žazep Barel.
Jon pryvioŭ u prykład kanfiskavanyja Złučanymi Štatami aktyvy «na miljardy dalaraŭ» centrabanka Afhanistana, jakija, pavodle jaho słoŭ, u dalejšym pojduć na kampiensacyi achviaram teraryzmu i dla humanitarnaj dapamohi krainie. Dypłamat adznačyŭ, što «było b łahična» razhledzieć anałahičnyja kroki i z zamarožanymi reziervami Rasii.
«Ja byŭ by vielmi za, bo jana [inicyjatyva] poŭnaja łohiki <…> Chtości pavinien mnie rastłumačyć, čamu heta [kanfiskacyja reziervaŭ] dobra dla afhanskich hrošaj i drenna dla rasijskich hrošaj», — skazaŭ kiraŭnik jeŭrapiejskaj dypłamatyi.
Na jaho dumku, pytańnie ab tym, jak płacić za adnaŭleńnie Ukrainy, źjaŭlajecca adnym z centralnych palityčnych pytańniaŭ dla ES, uličvajučy «niejmaviernuju sumu hrošaj», jakaja spatrebicca. Jon taksama vykazaŭ nadzieju, što dyskusija ab «vajennaj kampiensacyi» budzie sychodzić z Rasii.
