«Jana pavinna adroźnivać nas ad inšych». Łukašenka apraŭdvaŭsia za zamienu nacyjanalnaj simvoliki
Alaksandr Łukašenka raskazaŭ, čamu dla jaho nieprymalnaja nacyjanalnaja simvolika: BČB-ściah i hierb «Pahonia».
«Dyk voś, adkazvaju niepasredna na hetaje pytańnie, nie chavajučy hałavu, jak straus, u piasok, pakolki pierad vami staić čałaviek, jaki inicyjavaŭ u najnoŭšaj historyi na refierendumie pytańni ab simvolicy našaj dziaržavy, vypracoŭvaŭ jaje, słuchaŭ śpiecyjalistaŭ, ich matyvacyju», — skazaŭ palityk.
Dziaržaŭnyja simvały pavinny rabić dziaržavu adroznaj ad inšych, kaža Łukašenka. «Jany pavinny adroźnivać nas z vami ad inšych. Jaki byŭ prapanavany hierb? «Pahonia». Vam jon nie nahadvaje hierb inšaj krainy? Mnie nahadvaje. Nam byŭ prapanavany ściah. Dadaj jašče adnu pałosku — i my zapazyčvali susiedniaj krainy ściah. Dyk niaŭžo ŭ nas nie było svajoj historyi? Niaŭžo my chacieli padahnać svaju historyju i svaju krainu pad Litvu abo Polšču? I jak aktualna heta siońnia hučyć!»
Nasamreč, čyrvona-zialony ściah i hierb-vianok byli prydumanyja ŭ saviecki čas pa adzinym dla ŭsich «sajuznych respublik» šabłonie.
Arhumient «padobnaści» nie vytrymlivaje ani hieraldyčnaj, ani navukovaj krytyki. Na ściahach Rasii, Francyi, Niderłandaŭ i Čechii try adnolkavyja kolery ŭ roznych spałučeńniach? A rasijski, polski, niamiecki arły ŭzychodziać, imavierna, da simvałaŭ Rymskaj impieryi.
Čytajcie taksama: Sapraŭdnyja biełaruskija simvały: voś što treba viedać pra Pahoniu i BČB
