Fiermiera, jaki chacieŭ stać prezidentam i zdymaŭ fejki dla ŚMI, pakazali ŭ siužecie dziaržTB pra raspaŭsiud narkotykaŭ
Homielskaha fiermiera, jaki ŭdzielničaŭ u prezidenckich vybarach 2020 hoda, Juryja Hanceviča teleradyjokampanija «Homiel» pakazała ŭ siužecie pra sud za raspaŭsiud psichatropaŭ.
Ź videa vynikała, što mužčynu abvinavacili ŭ pracy na internet-kramu narkotykaŭ z krasavika 2020-ha pa žnivień 2021-ha hoda. Nibyta jon atrymoŭvaŭ tavar u Rasii, fasavaŭ i rabiŭ zakładki ŭ Homielskaj vobłaści. Pavodle śledstva, abvinavačany paśpieŭ pradać psichatropy jak minimum siami pakupnikam i zarabiŭ kala 160 tysiač rubloŭ.
Paźniej akazałasia, što heta «techničnaja pamyłka». Asudžany byŭ zusim inšy čałaviek, a dziaržTB prosta vykarystała archiŭnyja kadry z Hancevičam.
«Było pakazana miesca dla abvinavačanaha, dzie znachodziŭsia hramadzianin, jaki nie maje dačynieńnia da vyšejzhadanaha złačynstva», — patłumačyła TB.
Čym viadomy Hancevič?
Hancevič — fiermier i ŭłaśnik ahrasiadziby pad Homielem. Jon bałatavaŭsia ŭ deputaty na parłamienckich vybarach 2019 hoda i pazicyjanavaŭ siabie jak prychilnik Siarhieja Cichanoŭskaha. Hancevič vioŭ błoh «Narodny deputat». Uviesnu 2020 hoda zajaviŭ, što bałatujecca ŭ prezidenty, ale nie sabraŭ podpisy. U žniŭni 2020 hoda pierad vybarami Hanceviča zatrymlivali jak padazravanaha pa artykule ab abrazie milicyjanieraŭ. U krasaviku Hancevič źniaŭsia ŭ pastanovačnym videa, dzie mužčynu nibyta źbivali za bieł-čyrvona-bieły ściažok na dziciačym rovary.
Videa zdymaŭ praŭładny błohier Jaŭhien Katlaroŭ, jaki skidaŭ fejki niezaležnym ŚMI. Paśla vykryćcia Hancevič zajaviŭ, što ludzi «vierać u roznuju brydotu», a Śviatłanu Cichanoŭskuju «zaprahramavali i zavierbavali».
9 maja 2021 hoda Hanceviča zatrymali ŭ centry Homiela, kali jon strymiŭ śviatkavańnie Dnia Pieramohi. Pra aryšt nie paviedamlałasia. Hancevič vioŭ telehram-kanał dla prasoŭvańnia svajoj fiermierskaj pradukcyi.
