Voźmucca za historykaŭ? Łukašenkaŭcy patrabujuć novych čystak
U praŭładnych kanałach pačalisia napadki na jašče adnu hrupu historykaŭ, jakich łukašenkaŭcy ličać niedastatkova łajalnymi. Heta vybitnyja navukoŭcy.
Fota: Akademija navuk Biełarusi
Adzin z tych, kaho zhadvajuć, — Aleś Suša. Da niadaŭniaha času jon byŭ namieśnikam hiendyrektara Nacyjanalnaj biblijateki, ciapier pracuje ŭ Akademii navuk — u Centry encykłapiedyčnych vydańniaŭ. Jon taksama namieśnik dyrektara Centralnaj navukovaj biblijateki.
Aleś Suša. Fota: sacyjalnyja sietki
Suša viadomy jak papularyzatar spadčyny Franciška Skaryny. Spryjaŭ viartańniu ŭ Biełaruś jaho «Małaj padarožnaj knihi».
Navukoviec daśleduje taksama historyju biełaruskaha chryścijanstva. Ź jaho ŭdziełam byli aličbavanyja kaštoŭnyja histaryčnyja dakumienty.
Inšy historyk — Mikałaj Płavinski, ź Instytuta historyi Akademii navuk. Jon zahadčyk adździeła archieałohii Połackaj ziamli i sumiežnych terytoryj.
Mikałaj Płavinski. Fota: sacyjalnyja sietki
Adzin z najviadomiejšych biełaruskich archieołahaŭ. Jaho baćka, taksama archieołah, daśledavaŭ pachavalnyja kurhany ŭ Homielskaj, Viciebskaj i Minskaj abłaściach.
Pad razdaču trapiŭ i dacent Vadzim Košman, zahadčyk centra archieałohii Biełarusi. Jon abaraniaŭ kandydackuju pa temie «Sielskija pasieliščy mižrečča Biareziny i Dniapra ŭ Ch—CHIII stahodździach». Pisaŭ taksama navukovyja pracy pa Traściancy.
Vadzim Košman. Fota: sb.by
Łukašenkaŭcy hnievajucca, što hetyja navukoŭcy zachavali svaje pasady.
«A čyje heta prateže, spadary akademiki? Chto ich «kryšuje»?» — łukašenkaŭskija kanały pahražajuć niedastatkova aktyŭnym u represijach padnačalenych kiraŭnikam instytutaŭ.
Palityčna matyvavanyja zvalnieńni va ŭniviersitetach i Akademii navuk iduć uvieś pieryjad kiravańnia Alaksandra Łukašenki.
Za apošnija amal dva hady ŭ vyniku niekalkich chval čystak zvolnili mnohich navukoŭcaŭ NAN. Pracu stracili šmatlikija supracoŭniki adździaleńniaŭ bijałahičnych navuk, fizika-techničnych navuk, humanitarnych navuk, mastactvaŭ, Nacyjanalnaha histaryčnaha archiva. Za pazicyju nie praciahvali kantrakt prafiesaram univiersitetaŭ.