Daśledavańnie: Inviestary kampanij, jakija syšli z Rasii, akazalisia ŭ vyhadzie, bo reputacyja ciapier cenicca bolš, čym raniej
Biełarusi varta ŭličvać, što ŭ sučasnym śviecie palityčnyja ryzyki i reputacyja krainy turbujuć inviestaraŭ značna macniej, čym heta było hadoŭ 10—20 tamu. Pra heta śviedčyć aŭtarytetnaje zachodniaje daśledavańnie, piša hazieta «Biełorusy i rynok».
Rynkavaja kapitalizacyja kampanij, jakija całkam abo častkova syšli z rasijskaha rynku, vyrasła, a tych, što zastalisia — abvaliłasia. Pra heta śviedčyć daśledavańnie Jelskaj škoły mieniedžmientu.
Daśledavańnie pryśviečanaje dynamicy akcyj kampanij, u jakich byŭ biznes u Rasii, u pieryjad z kanca lutaha da pačatku krasavika. U vybarku trapiła kala 600 kampanij.
Kapitalizacyja tych kampanij, jakija całkam syšli z Rasii, vyrasła ŭ siarednim na 3-4%. Kampanii, jakija spynili novyja inviestycyi, ale zastalisia ŭ Rasii, stracili ŭ siarednim kala 2% kapitalizacyi. A voś tyja kampanii, jakija praciahnuli pracavać biez usialakich abmiežavańniaŭ, stracili ŭ siarednim jašče bolš — kala 5,5% rynkavaj kapitalizacyi.
Heta śviedčyć pra toje, što z punktu hledžańnia inviestaraŭ, ryzyki praciahu biznesu ŭ Rasii pieravyšajuć straty ad sychodu z rynku, patłumačyŭ biełaruski finansavy analityk Maksim Adaskievič. Jon nahadaŭ, što jak tolki «Dojče Bank» pieradumaŭ i ŭsio ž abviaściŭ pra poŭny sychod z Rasii, jaho rynkavaja kapitalizacyja vyrasła na sumu navat bolšuju, čym suma ŭsich vydadzienych bankam kredytaŭ u hetaj krainie.
Analityk rastłumačyŭ, čamu zachodnija biznesoŭcy aceńvajuć reputacyjnyja ryzyki ad viadzieńnia biźniesu ŭ Rasii vyšej, čym straty ad sychodu. Pa-pieršaje, Rasija — adnosna nievialiki rynak dla bolšaści bujnych mižnarodnych karparacyj.
Pa-druhoje, pry zachavańni biznesu ŭ Rasii raści jamu budzie składana va ŭmovach izalacyi i padzieńnia VUP. Klučavyja akcyjaniery bolšaści karparacyj — heta bujnyja fondy, dla jakich važnyja pryncypy adkaznych inviestycyj (ESG). Plus usio bolšuju papularnaść nabirajuć indeksy, pabudavanyja na hetych pryncypach.
Viadzieńnie biznesu ŭ Rasii moža stvarać ryzyku dla kampanii nie patrapić u hetyja indeksy. Mahčymyja bajkoty abo prosta sychod da kankurentaŭ z boku piersanału, klijentaŭ, pastaŭščykoŭ taksama adyhryvajuć svaju rolu. Usio heta bje pa maržynalnaści i, adpaviedna, košcie biznesu.
«Takim čynam, u sučasnym śviecie sychodzić z Rasii dla bujnoha transnacyjanalnaha biznesu, jak praviła, ekanamična całkam apraŭdana. Pryčym niezaležna ad palityčnych pohladaŭ mieniedžmientu.
Absalutna mahčyma, što situacyja była b inšaj, kali b «24 lutaha» zdaryłasia 20 hadoŭ tamu. Ci zdaryłasia b ciapier, ale nie z Rasijaj, a z Kitajem, jaki ekanamična ŭ razy bolš istotny dla hłabalnych karparacyj, čym Rasija», — adznačaje Maksim Adaskievič.
Na dumku ekśpierta, Biełarusi varta ŭličvać, što ciapier palityčnyja ryzyki i reputacyja krainy turbujuć inviestaraŭ značna macniej, čym heta było hadoŭ 10-20 tamu, kali byŭ mahčymy prychod u Biełaruś inviestaraŭ nakštałt Telekom Austria abo «Rafajzen Bank».
