Pačałasia apieracyja pa evakuacyi ludziej z «Azoŭstali» ŭ Maryupali
Apieracyja pa evakuacyi ludziej sa staleliciejnaha zavoda va ŭkrainskim horadzie Maryupal pačałasia ŭ niadzielu, paviedamiła ahienctva AP sa spasyłkaj na AAN.
Pradstaŭnik AAN pa humanitarnych pytańniach Savijana Abreu paviedamiŭ Associated Press, što apieracyja pa evakuacyi ludziej z «Azoŭstali» pravodziłasia sumiesna ź Mižnarodnym kamitetam Čyrvonaha Kryža i ŭ kaardynacyi z ukrainskimi i rasijskimi aficyjnymi asobami.
Ličycca, što ŭ zabłakavanym Maryupali ŭsio jašče znachodziacca da 100 000 čałaviek, u tym liku da 1000 mirnych žycharoŭ, jakija razam z prykładna 2000 ukrainskich bajcoŭ schavalisia pad staleliciejnym zavodam — adzinaj častkaj horada, nie akupavanaj rasijanami.
Abreu nazvaŭ situacyju vielmi składanaj i ŭstrymaŭsia ad inšych kamientaryjaŭ.
Miarkujecca, što evakuacyja projdzie ŭ Zaparožža, što znachodzicca prykładna ŭ 227 kiłamietrach na paŭnočny zachad ad Maryupala. Mienavita ŭ Zaparožža vyjechali žychary Maryupala, jakija raniej samastojna pakinuli horad, kali raniejšyja evakuacyi, arhanizavanyja Čyrvonym Kryžam i Ukrainaj, daviałosia skasavać praz abstreły abo čakanuju niebiaśpieku na šlachu.
«Pieršaja hrupa prykładna sa sta čałaviek užo nakiroŭvajecca na padkantrolnuju nam terytoryju. Budziem zaŭtra sustrakać ich u Zaparožžy», — skazaŭ prezident Ukrainy Uładzimir Zialenski.
AAN paviedamiła, što kałona dla evakuacyi hramadzianskich asob adpraviłasia ŭ piatnicu, prajechaŭšy kala 230 kiłamietraŭ, pierš čym dabracca da zavoda ŭ Maryupali ŭ subotu ranicaj.
