Financial Times: Rasija adčuvaje niedachop vysokadakładnych rakiet
Rasija ŭžo sutyknułasia ź niedachopam vysokadakładnych rakiet, piša sa spasyłkaj na svaje krynicy Financial Times.
Fota: Domantas Pipas
«Ich zapasy abmiežavanyja, jany vyčerpvajucca, i my bačym, što im davodzicca pieramiaščać rakiety «Kalibr» ź inšych stratehičnych napramkaŭ, dzie jany mohuć zachoŭvacca», — skazaŭ FT zachodni čynoŭnik. Pavodle jahonych słoŭ, havorka idzie pra kryłatyja rakiety marskoha bazavańnia.
«Heta śviedčyć pra toje, što ich zapasy vysokadakładnaj zbroi skaračajucca», — apisaŭ situacyju surazmoŭca haziety.
Bolšaść rasijskich udaraŭ na ciapierašnim etapie vajny zasiarodžanaja na ŭschodniaj častcy Danbasu i horadzie Maryupal, apisaŭ situacyju inšy surazmoŭca FT. Pavodle jaho słoŭ, bolšaść zahadaŭ pra abstreły nosić «durny, a nie vysokadakładny» charaktar.
«My dumajem, što heta śviedčyć ab prablemach, ź jakimi rasijanie sutykajucca z papaŭnieńniem [vysokadakładnych bojeprypasaŭ]», — skazaŭ amierykanski čynoŭnik FT.
Prablemy z papaŭnieńniem zapasaŭ vysokadakładnaj zbroi mohuć być źviazanyja jak z «jakaściu pramysłovaj bazy», tak i z zachodnimi sankcyjami, jakija «abmiažoŭvajuć zdolnaść naroščvać patencyjał u toj čas, kali heta nieabchodna na poli boju», raspaviała krynica haziety.
Namieśnica ministra abarony Ukrainy Hanna Malar na tydni paviedamiła, što Rasija ŭžo vypuściła pa terytoryi Ukrainy 1300 vysokadakładnych rakiet, ź ich 235 rakiet «Kalibr». Ahulny košt vypuščanych pa Ukrainie rakiet składaje 7,5 młrd dalaraŭ, padličyŭ Forbes.
Z pačatku vajny, pa słovach Malar, rasijskija zapasy rakiet skaracilisia bolš čym u dva razy, a ŭ pierśpiektyvie dla ich papaŭnieńnia spatrebiacca zamiežnyja kamplektujučyja. «Pakolki prymianiajucca sankcyi, a da častki ich uzbrajeńnia jany vykarystoŭvali kamplektujučyja ź inšych krain, to ciapier im budzie składana heta adnaŭlać», — cytuje Malar ahienctva UNIAN.
