Ukraincy znajšli ŭ pałonnaha trafiejny telefon. I adšukali 10-hadovuju dziaŭčynku, u jakoj jon jaho zabraŭ
U 10-hadovaj Ivanki z Sumščyny padčas prachodžańnia humanitarnaha kalidora zabrali telefon rasijskija vajskoŭcy. Ale dziakujučy 93-j mabilnaj bryhadzie «Chałodny Jar», mabilny telefon viarnuŭsia da haspadyni.
U pałon da chaładnajarcaŭ trapiŭ miechanik-kiroŭca z Kantemiraŭskaj dyvizii rasijskich uzbrojenych sił. U jaho znajšli čyrvony mabilny telefon, a taksama paŭerbenk sa strazami. Spačatku akupant chłusiŭ, što heta jaho rečy. I sapraŭdy, u mabilnym była sim-kartka adnaho z rasijskich apierataraŭ. I z hetaha telefona ŭžo byli zvanki ŭ Rasiju. Adnak u śpisie kantaktaŭ byli i ŭkrainskija numary, pryčym padpisanyja «tatka» i «mamula». Chaładnajarcy pačali telefanavać na hetyja numary. Akazałasia, što telefon naležyć Ivancy.
Maci Ivanki Alena zhadvała, što jany 15 sakavika vyjechali ŭsioj siamjoj evakuacyjnym kalidoram z Traścianca (Sumskaja vobłaść), na toj čas akupavanaha.
«Kali stajali ŭ evakuacyjnaj kałonie, padyšli vajskoŭcy RF i skazali addać usie telefony. Ja adkazała, što ŭ nas jany ŭsie razradžanyja. Da hetaha my pavydalali z telefonaŭ usie miesiendžary, kab nie davać vorahu lubuju infarmacyju. Kali vyjazdžali z horada, na błokpoście rasijskija vajskoŭcy chadzili z kardonnaj skrynkaj i adbirali telefony va ŭsich, chto jechaŭ z horada, pahražajučy rasstrełam. Jany kryčali i zapałochvali nas. Kazali, nibyta my ich zdymajem.
Prajšło prykładna try dni, na moj numar patelefanavali chłopcy i spytali: heta vy matula? Ja adkazała — tak. Dźmitryj z 93-j bryhady raspavioŭ, što jany ŭ pałonnaha rasijskaha vajskoŭca znajšli telefon. Pytalisia, ci žyvyja my».
«Ja była tak ŭschvalavanaja, što spačatku nie pavieryła, dumała, što heta niejkija žarty. Ivanka vielmi płakała z-za taho, što zabrali telefon. I choć moj muž skazaŭ chłopcam pakinuć telefon sabie, jany ŭsio roŭna adpravili jaho nam novaj poštaj», — raskazała žančyna.
