Maskva pačynaje rychtavać rasijan da taho, što «my pieramahli, možna spyniacca». Što heta aznačaje dla Ukrainy i rehijona
Prasoŭvańnie rasijskich vojskaŭ spyniłasia va Ukrainie na ŭsich frantach, akramia Danbasa, miescami ŭkraincy pierajšli ŭ kontrnastup. Možna prahnazavać, što Rasija abvieścić pra dasiahnieńnie metaŭ apieracyi paśla ŭziaćcia pad svoj kantrol Maryupala, a vajna piarojdzie ŭ stan zamarožanaha kanfliktu. Tłumačym, jakija buduć nastupstvy hetaha.
Ukrainski vajskoviec havoryć pa telefonie. Fota: AP
Siońniašnija zajavy Minabarony Rasii prahučali jak padrychtoŭka hramadskaj dumki da spynieńnia «śpiecapieracyi», jak jaje nazyvajuć u Rasii.
«Z 152 vajennych samalotaŭ [va Ukrainy] zastałosia 112, z 149 viertalotaŭ — 75, z 36 bieśpiłotnikaŭ «Bajraktar TB2» źniščanyja 35». Kali vy źniščyli 35 z 36 «Bajraktaraŭ», pakažycie abłomki ich.
«Praktyčna całkam źniščanyja ŭkrainskija pavietranyja siły i sistema supraćpavietranaj abarony, pierastali isnavać VMS krainy». Zdajecca, pra heta Rasija ŭžo zajaŭlała adzin raz, paśla pieršaha dnia vajny. Ale rasijskija samaloty dahetul nie zalatajuć unutr Ukrainy, dziejničajuć tolki ŭ pryfrantavoj zonie.
«Rasijskimi vojskami zabłakavanyja Kijeŭ, Charkaŭ, Čarnihaŭ, Sumy i Nikałajeŭ, pad poŭnym kantrolem znachodziacca Chiersonskaja i vialikaja častka Zaparožskaj vobłaści». Čarnabajeŭku vyvieli sa składu Chiersonskaj vobłaści.
«Za miesiac straty ŭkrainskich vojskaŭ skłali kala 30 tysiač čałaviek, u tym liku bolš za 14 tysiač biezzvarotnyja i kala 16 tysiač sanitarnyja». Niapraŭda chacia b tamu, što suadnosiny zabitych dy paranienych u kanfliktach našaha času składajuć 1 da 3 ci 4.
«Na žal, u chodzie śpiecyjalnaj vajennaj apieracyi jość straty siarod našych bajavych tavaryšaŭ. Na siońnia zahinuŭ 1 351 vajskoviec, 3 825 atrymali ranieńni».
Pavodle acenak zachodnich analitykaŭ, rasijskaja armija straciła kala 7 000—10 000 zabitymi, 30 000 paranienymi. Takija acenki hruntujucca na kolkaści źniščanaj rasijskaj techniki i spadarožnikavych fota. Uskosna takija acenki paćviardžajucca tym faktam, što Rasija straciła zabitymi šeść hienierałaŭ i namieśnika kamandujučaha Čarnamorskim fłotam, tady jak Ukraina — nivodnaha vojenačalnika takoha ranhu.
«Asnoŭnyja zadačy pieršaha etapu rasijskaj apieracyi na Ukrainie vykanany, istotna źnižany bajavy patencyjał ukrainskich vojskaŭ», — zajaviŭ pradstaŭnik Minabarony Rasii.
Hienierał-major Ihar Kanašenkaŭ i pres-sakratar Dźmitryj Piaskoŭ paŭtarajuć jak mantru aficyjny tezis ab tym, što apieracyja «pravodzicca pa zaćvierdžanamu płanu».
Načalnik Hałoŭnaha apieratyŭnaha ŭpraŭleńnia Hienštaba Rasii Siarhiej Rudskoj taksama skazaŭ, što rasijskaja armija «nie płanavała» šturmu akružanych ukrainskich haradoŭ. Hetaje śćviardžeńnie takoje ž dalokaje ad realnaści, jak i pryviedzienyja vyšej.
Rasijskija vojski sprabavali akružyć Kijeŭ, Charkaŭ, Čarnihaŭ, Sumy, Mikałajeŭ. Hetyja harady padvierhlisia varvarskim abstrełam, ale avałodać imi rasijskaja armija nie zmahła. Całkam akružany byŭ tolki Maryupal, raźmieščany ŭ niepasrednaj blizkaści da Kryma i Danbasa, zaniatych rasijskimi vojskami jašče ŭ 2014-m.
«Pieršapačatkova my i nie płanavali ich [ukrainskich haradoŭ] šturm, kab nie dapuścić razbureńniaŭ i minimizavać straty siarod asabistaha składu i mirnaha nasielnictva»,— skazaŭ Rudskoj na bryfinhu ŭ piatnicu.
«I choć takuju mahčymaść my nie vyklučajem, adnak pa miery vykanańnia asobnymi hrupoŭkami pastaŭlenych zadač, a jany vyrašajucca paśpiachova, našy siły i srodki buduć kancentravacca na hałoŭnym — poŭnym vyzvaleńni Danbasa», — cytujuć Rudskoha rasijskija ahienctvy.
Rasija chacieła b, kab ukraincy paddalisia ŭ Danbasie, tady byŭ by arhumient dla padahretaj impierskimi ambicyjami publiki.
Kaniečnie, nie Danbas jany chacieli ad pačatku, zusim pra inšaje čytaŭ televizijnyja lekcyi Pucin. «Vyzvaleńnie Danbasa» — heta dobraja mina pry kiepskaj hulni.
Razroźnienyja fakty ŭžo z tydzień pakazvali, što asnoŭnyja siły rasijskaj armii pastupova pierakidvajuć na Danbas, nastup tam idzie z troch kirunkaŭ: ad Iziuma, pad Zaparožžam i z Vałnavachi plus praciahvajecca rujnavańnie pakutnaha Maryupala, jaki skoŭvaje elitnyja čaści rasijskaj armii. Tady jak pad Kijevam, Charkavam i Chiersonam ruskija akopvajucca.
Navažymsia sprahnazavać, što paśla ŭstanaŭleńnia kantrolu nad Maryupalem Rasija zajavić pra dasiahnieńnie metaŭ apieracyi i spynieńnie bajavych dziejańniaŭ. U takim vypadku heta budzie aznačać, što Rasija, jakaja chacieła raz i navieki źniščyć ukrainskuju dziaržaŭnaść, hatovaja zadavolicca zachopam suchaputnaha kalidora z Danbasa ŭ Krym.
Dabicca hetaha Maskvie udałosia koštam dziasiatkaŭ tysiač žyćciaŭ, straty zołatavalutnych reziervaŭ na 300 miljardaŭ dalaraŭ i mižnarodnaj izalacyi, jakoj SSSR nie pieražyvaŭ. U AAN tolki čatyry krainy (Biełaruś, Paŭnočnaja Kareja, Siryja i Erytreja) hałasujuć razam z Rasijaj, tady jak 140 — suprać, a Kitaj ustrymaŭsia. Navat padčas uvarvańnia SSSR u Afhanistan rezalucyi z asudžeńniem hetaha nabirali dva dziasiatki hałasoŭ suprać. A tut — čatyry, pryčym usie ekanamična adstałyja dyktatury. Heta poŭnaje dypłamatyčnaje fijaska.
Ale samaje strašnaje dla Maskvy — nie dypłamatyja, plavać hebisty chacieli na dypłamatyju, a toje, što Rasiju paśla 2022 hoda pierastanuć bajacca.
Kali Ukraina vytrymała ŭdar rasijskaj armii, nie majučy sučasnaj supraćpavietranaj abarony, to ni pra jakoje sutyknieńnie Rasii z NATA nie moža iści i havorki.
Abaronny patencyjał Ukrainy — heta niekalki pracentaŭ ad mahutnaści NATA. Łukašenka, nahadajem, miesiac nazad pahražaŭ dajści da Ła-Manša. Nu, davaj, idzi.
Pucin i jaho vierny Łukašenka ŭ 2022-m praličylisia va ŭsim: u acency siły Ukrainy («vajna praciahniecca try-čatyry dni»), u acency rašučaści Zachadu («bieź jaic»), u acency ŭłasnaj vajennaj mahutnaści. Hetyja praliki, jak i hieraizm ukrainskaha narodu i talent ukrainskich vojenačalnikaŭ uvojduć u padručniki.
Maskva i Łukašenka dumali, što Jeŭropa heta frajer, jakoha možna ŭziać na pont, što Zialenskaha možna ŭziać na pont. Panty nie prajšli.
I heta jašče Zachad daŭ Ukrainie tolki «Stynhiery» i «Džavieliny». A kali ŭrešcie daść «Petryaty», «Tamahaŭki» i stolki «Bajraktaraŭ», kolki treba?
Ci moža Ukraina pieramahčy? Na ździŭleńnie ŭsich, vyjaviłasia, što tak, moža, mahła b — kali b atrymała nastupalnuju zbroju i SPA. Ale śviet baicca hulać u hulniu «a davajcie pabačym, jak budzie dryhacca Pucin, zahnany ŭ kut».
U kožnym razie, kali hety nastup Rasii piarojdzie ŭ stadyju viałaciakučaha abmienu ŭdarami, Ukraina i Jeŭropa atrymajuć pieradyšku. Ukraina atrymaje pieradyšku, ale nie Rasija i jaje sajuźniki — paśla taho, što adbyłosia, ich praciahnuć realna dušyć, až pakul nie zmusiać hulać pa praviłach. Azoŭskaje mora pieratvorycca va ŭnutranaje mora Rasii — ale straciła Maskva našmat bolš, a stracić jašče bolš.
Novaja Paŭnočnaja Kareja ci vasał Kitaja? Voś jakaja budučynia čakaje Rasiju
«Rasija blizkaja da poŭnaj parazy». 12 tezisaŭ Frensisa Fukujamy pra toje, jakija nastupstvy budzie mieć pieramoha Ukrainy ŭ vajnie
Alaksandr Frydman: Rasija ruchajecca pa samaj žudasnaj trajektoryi, jakuju tolki možna ŭjavić
