«Jak my reahujem? Nijak». Minski deputat prakamientavaŭ parušeńnie Kanstytucyi i zapusk rakiet ź biełaruskaj terytoryi
Čytačka «Našaj Nivy» spytała ŭ deputata Minharsavieta Eduarda Kuźniacova, čamu parušajecca artykuł Kanstytucyi, jaki vyklučaje vajennuju ahresiju z terytoryi Biełarusi ŭ adnosinach da inšych dziaržaŭ. Pryvodzim ich dyjałoh.
Fota: staronka ŭ sacyjalnych sietkach.
U razmovie Luboŭ pacikaviłasia, kali budzie vykonvacca novaja Kanstytucyja, jakaja nabyła moc 15 sakavika 2022 hoda, i jak paŭdzielničać u subotniku i nie być zatrymanym AMAPam.
— Što vam adkazać…
— Praŭdu.
— Nie mahu vam ničoha adkazać na hetaje pytańnie.
— Čamu?
— Nieŭpaŭnavažany.
— Dobra, tady skažycie chacia b, kali budzie vykonvacca artykuł 18 Kanstytucyi Respubliki Biełaruś, jakaja była pryniata 27 lutaha 2022 hoda: «Respublika Biełaruś vyklučaje vajennuju ahresiju sa svajoj terytoryi ŭ adnosinach da inšych dziaržaŭ»?
— Ja b jaho nasamreč zaŭsiody vykonvaŭ, ale heta ž nie majo rašeńnie.
— A čyjo?
— Takoje rašeńnie moža pryniać tolki prezident.
— A jaki prezident?
— Jak jaki? Respubliki Biełaruś.
— Śviatłana Cichanoŭskaja takoha rašeńnia nie prymała. Mabyć, vy pra spadara Łukašenku?
— Kaniečnie, kaniečnie.
— To-bok jon moža parušać Kanstytucyju i my možam nie źviartać na heta ŭvahi, tak?
— Ja nie kažu, što jon jakim-niebudź čynam parušaje Kanstytucyju.
— A jak ža artykuł 18, u jakim čornym pa biełamu napisana ab vyklučeńni vajennaj ahresii?
— Vy mnie jakoje pytańnie chočacie zadać? Ja vam na hetaje pytańnie nie adkažu. Navošta vy mnie jaho zadajacie?
— Vy ž pradstaŭnik ułady? Vy ž abaraniajecie intaresy narodu, zakon, tak ci nie?
— Tak, abaraniaju. Čamu nie?
— Dyk voś idzie parušeńnie 18-ha artykuła Kanstytucyi. Vy jak deputat Minharsavieta jak reahujecie na takoje parušeńnie?
— Jak my reahujem? Nijak my nie reahujem.
— A čamu? Navošta vy tady patrebny?
— My patrebny, kab adkazać vam na pytańnie, chto adkazvaje za ŭborku terytoryi.
— Nie, čakajcie. Pytańnie parušeńnia Kanstytucyi bolš važnaje. Ja zrazumieła vaša staŭleńnie. Karaciej, u vojska zabivać bratoŭ-ukraincaŭ vy nie pojdziecie, za heta ŭžo vam dziakuj. U mianie jašče pytańnie. Chutka subotniki. Jak ludziam na ich źbiracca i nie bajacca, što ich mohuć zatrymać?
— Ja vam adkažu, jak heta zrabić. Jość płan pa subotnikach. Pryjedzie ŽKH i vam dapamoža.
— Nam nikoli instrumienty dla hetaha nie davali.
— Tamu što vy nie kazali administracyi, kali vy chočacie zrabić subotnik. Davajcie tak. Vy pieražyvajecie, što vas zatrymajuć padčas subotnika. Nie pieražyvajcie.
— Vy ž viedajecie, što zaraz vajna pamiž Rasijaj i Ukrainaj, Biełaruś daje svaju terytoryju. Ludzi pačali hladzieć, dzie bambaschoviščy, prybirać tam. Pryjechała milicyja, i ich zatrymali. Jak rabić subotniki?
— Ja vam jašče raz kažu, što treba infarmavać administracyju rajona. Prosta telefanujcie ŭ ŽKH i kažycie, što vy, naprykład, zaŭtra budziecie rabić subotnik.
— I tady nas nie zatrymajuć?
— Vas nie tolki nie zatrymajuć, a i daduć techniku i ludziej.
— I navat možna vopratku lubuju apranuć? Žoŭta-błakitnuju ci bieł-čyrvona-biełuju…
— Nie viedaju. Kali vy prosta chočacie prybrać terytoryju, to navošta apranać bieł-čyrvona-biełaje adździeńnie? Pahladzicie, jak ŽKH chodzić. Pravakacyi buduć spyniacca.
— Jakija pravakacyi?
— Nu što vy… My ž razam z vami pieražyli 2020 hod.
— Prabačcie, pieražyli, ale nie razam. Ja stužki ŭ dvarach nie zdymała.
Eduard Kuźniacoŭ — deputat ad Uručskaj vybarčaj akruhi №51. Jon pracuje namieśnikam dyrektara kampanii «Finprofit».
Zimoj 2020 hoda Eduard Kuźniacoŭ byŭ adnym z tych, chto prybiraŭ bieł-čyrvona-biełyja stužki ŭ minskim rajonie Uručča.
Deputat ličyŭ heta parušeńniem paradku. Tady jon adkazvaŭ: «Nu ŭjavicie: da vas prychodziać dadomu i pačynajuć viešać usiakaje hłupstva, jakoje žycharam nie padabajecca».
Čytajcie taksama:
U deputata parłamienta spytali, ci padtrymlivaje jon vajnu va Ukrainie. Voś što toj adkazaŭ
