«Doma byŭ pieratrus, ślady ad abutku». U Minsku zatrymany fatohraf Uładź Hrydzin
U minułym jon supracoŭničaŭ z Radyjo Svaboda.
«Doma niama. Mašyna ŭ dvary. Doma byŭ pieratrus — brudna, raskidanyja rečy, ślady ad abutku», — raskazała siastra Uładzia Hrydzina.
Paviedamlajecca, što žurnalist znachodzicca ŭ IČU na Akreścina.
U minułym Uładź Hrydzin supracoŭničaŭ ź Biełaruskaj słužbaj radyjo «Svaboda». Ën viadomy fatohraf, jaki vystaŭlaŭsia ŭ Biełarusi i za miažoju, atrymlivaŭ šmatlikija prafiesijnyja premii.
Siońnia stała viadoma taksama pra pieratrus u homielskaha žurnalista Anatola Hatoŭčyca i jašče dziasiatak pieratrusaŭ i zatrymańniaŭ va ŭsioj krainie.
U pryvatnaści, u Homieli zatrymanaja Ksienija Marcinovič — dačka viadomaha psichołaha Ały Marcinovič, jakaja była vymušanyja pakinuć krainu, ratujučysia ad palityčnaha pieraśledu.
Pravaabroncy z centra «Viasna» paviedamlajuć, što 3 lutaha pierastaŭ vychodzić na suviaź Anatol Cierašankoŭ. Pa infarmacyi blizkich, jon sfatahrafavaŭ hrupu milicyjantaŭ. Paśla hetaha Anatol pierastaŭ adkazvać na zvanki i paviedamleńni.
Taksama paviedamlajecca pra źniknieńnie suviazi z Hannaj Kažemaks. Jana była naziralnicaj na vybarach u 2020 hodzie. 5 lutaha Hanna pryjechała z Ukrainy ŭ Biełaruś. U jaje pad aknom byŭ zaŭvažany bus ź ludźmi ŭ formie, paśla hetaha Hanna pierastała vychodzić na suviaź.
4 lutaha paśla 15-sutačnaha aryštu ź CIPa na Akreścina nie vyjšli braty Illa i Mikita Valencinovičy. 20 studzienia ich aryštoŭvali za nibyta «niepadparadkavańnie» pa art. 24.3 KaAP. Bratoŭ pierazatrymali. Mahčyma, nad imi adbudziecca novy sud, ale artykuł pakul nieviadomy.
Što datyčyć «Radyjo Svaboda», to siłaviki ŭvarvalisia ŭ jaho minski ofis 16 lipienia 2021 hoda, vyrvali kamiery videanazirańnia na paviersie, vyłamali troje dźviarej u ofisie dy kanfiskavali techniku. U toj ža dzień ź pieratrusam pryjšli da byłych žurnalistaŭ «Svabody» Aleha Hruździłoviča, Iny Studzinskaj i Alesia Daščynskaha. Ich zatrymali i pakarali aryštam na 10 dzion.
Hruździłoviča zatrymali paŭtorna 23 śniežnia, zamianiŭšy mieru strymańnia z abaviazańnia jaŭki na ŭtrymańnie pad vartaj, pieraviali ŭ SIZA na Vaładarskaha. Śledčyja vystavili jamu abvinavačańnie pavodle artykuła 342 Kryminalnaha kodeksa — arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich.
25 listapada byŭ zatrymany fryłansier «Svabody» Andrej Kuźniečyk, jamu dvojčy davali pa 10 sutak aryštu, a potym pieraviali ŭ SIZA na Vaładarskaha pa kryminalnaj spravie.
Zatrymlivaŭsia, ale byŭ adpuščany z kryminalnaj spravaj aŭtar «Svabody» Sieviaryn Kviatkoŭski, jaki nieadkładna paśla hetaha vyjechaŭ za miažu. U intervju jon zajaviŭ, što śledčych cikaviła infarmacyja pra Radyjo «Svaboda».
Ahułam za kratami ŭ Biełarusi zastajecca niekalki tysiač aryštavanych pa palityčnych matyvach, siarod ich 34 žurnalisty, u tym liku redaktary samych aŭtarytetnych ŚMI krainy, u tym liku «Našaj Nivy», Tut.baja i BiełaPAN.
