Ad Redakcyi: Pryznańnie «NN» ekstremisckim farmiravańniem — praktyčnyja i palityčnyja vysnovy z hetaha
Na vyjavie: «Naša Niva» restaŭravała biust Ivana Łuckieviča, jaki siłaviki raźbili ŭ časie pieratrusu 8 lipienia. Załatym — raskoliny.
Spačatku niekalki słoŭ ab praktyčnych spravach, bo «biez spraŭ viera miortvaja».
Pieršaje — heta biaśpieka našych čytačoŭ i krynic.
My i da hetaha viedali važnaść jaje i daŭno zrabili, što možam, dla maksimizacyi biaśpieki. My razumiejem, što siły zła buduć taksama šukać novyja i novyja sposaby ŭzłomvać niezaležnyja vydańni, ale filtry biaśpieki takija, što navat kali štości ŭzłamać udasca (a značnych uzłomaŭ niezaležnyja vydańni — nie tolki «Naša Niva», ale i našy kalehi ź inšych ŚMI, — pakul nie dapuskali), to źniščajecca ci vyciakaje tolki małaja porcyja, vuzki siehmient infarmacyi za nievialiki čas.
Druhoje — heta hrošy na vydańnie.
Kali b nie vy, čytačy, i nie vaša štotydniovaja padtrymka ŭ 2020—2021 hadach, Nivy b užo nie było. A tak — my vystajali, bastyjon biełaruščyny vystajaŭ. My budziem źviartacca pa vašu padtrymku i ŭ hetym hodzie. Trochi paźniej — kali dobra abdumajem pravilnuju taktyku i biaśpieku pracedur u hetym pytańni.
U minułyja hady biełarusy ŭnutry Biełarusi byli skałoj, na jakoj usio stajała. Zaraz, u 2022-m, vialikaja histaryčnaja adkaznaść za zachavańnie bastyjonaŭ biełaruščyny pakładziecca na biełarusaŭ zamiežža.
Standarty žurnalistyki «Našaj Nivy» nie źmieniacca ni na jotu, my heta harantujem.
My nie prahnazujem nijakaha padzieńnia čytanaści vydańnia — kumulatyŭna jana praciahvaje raści, trend niaźmienny ŭsie apošnija dziesiacihodździ i hady. Ludzi mianiajuć płatformy, ale ŭsio bolš čytajuć. Zachaplalna nazirać za hetym.
U novych umovach, z ulikam novych patreb aŭdytoryi nam, napeŭna, treba budzie raźvivać videa.
Uvieś čas padkazvajcie nam — sami ci praz znajomych, jakaja ciapier pravilnaja stratehija, jaki kantent zapatrabavany ciapier.
Pryznańnie «Našaj Nivy» ekstremisckim farmiravańniem bolš havoryć pra tych, chto pryznaŭ, čym pra «Našu Nivu».
My vierym, što ŭłady Respubliki Biełaruś — naŭrad ci hetyja, ale ŭžo nastupnyja — źmieniać kurs i admieniać rašeńni, skiravanyja na abmiežavańnie pravoŭ hramadzian, u tym liku i rašeńnie adnosna «Našaj Nivy».
Jak by ciažka ni było ciapier biełaruskim pakutnikam, biełaruskim hierojam, vy, našy darahija, i vy, ich rodnyja, pamiatajcie: usio budzie mieć kaniec, dola kataŭ budzie paskudnaj.
Niekatoryja pravodziać paraleli miž situacyjaj u našym rehijonie, u našaj krainie ŭ naš čas i napiaredadni Druhoj suśvietnaj. Nierazumna. Adroźnieńnie situacyi ŭ tym, što tady našy narody byli miž mołatam i kavadłam. Ciapier ža mołatavy to kuražacca, ale rybientropaŭ niama z druhoha boku.
Kali brać Biełaruś, to siły zła — u mienšaści, jany chočuć spynić ruch historyi teroram, ale ŭ tych histaryčnych umovach, u jakich my isnujem, jany hetym tolki paskarajuć pracesy.
Štodzień budziem pracavać. Zaŭtra ŭranku «Naša Niva» taksama apublikuje vyklučna važnyja materyjały. Sačycie za stužkaj.
