Tureckuju žurnalistku aryštavali za prykazki, jakija nibyta abražajuć Erdahana
Sud paličyŭ, što vyrazy kštałtu «Karona hałavie rozumu nie dadaje», jakija ŭžyvała žurnalistka Siedef Kabaš padčas intervju, abražajuć prezidenta Redžepa Taipa Erdahana, jaki bolš za 20 hadoŭ znachodzicca va ŭładzie.
Siedef Kabaš padčas intervju.
Tureckuju žurnalistku Siedef Kabaš aryštavali i adpravili za kraty paśla intervju ŭ žyvym efiry apazicyjnaha tureckaha kanała Tele1. Padčas hetaha intervju Kabaš pracytavała niekalki narodnych prykazak, jakija čynoŭniki paličyli abrazaj na adras Erdahana, paviedamlaje CNN.
Tak, Kabaš skazała, što skacina ŭ pałacy nie stanovicca carom, a tolki pieratvaraje pałac u chleŭ. Taksama jana zaŭvažyła, što čałaviek nie stanovicca mudrejšym ad doŭhaha našeńnia karony.
Hienieralnaja prakuratura Stambuła ŭbačyła ŭ hetych słovach abrazu prezidenta Turcyi, choć Kabaš nie zhadvała nijakaha imia. Ministr justycyi zajaviŭ, što «praklinaje vyrodlivyja słovy, jakija nakiravany suprać našaha prezidenta, abranaha hałasami našaj nacyi».
Žurnalistku zatrymali nočču ŭ subotu, advieźli ŭ palicejski ŭčastak, a zatym u prakuraturu. Adtul Kabaš dastavili ŭ sud, jaki vynies vierdykt ab aryšcie. Advakat žurnalistki Uhur Pojraz zajaviŭ, što budzie «da kanca zmahacca suprać biezzakońnia».
Niekamiercyjnaja arhanizacyja «Reparciory bieź miežaŭ» paśla aryštu Kabaš adznačyła, što za čas prezidenctva Erdahana ŭ Turcyi pavodle anałahičnych abvinavačvańniaŭ byli asudžanyja bolš za 70 žurnalistaŭ.
Erdahan zajmaje pasadu prezidenta Turcyi z 2014 hoda, a da hetaha 11 hadoŭ jon byŭ premjer-ministram. Styl kiravańnia Erdahana — aŭtarytarny, jon dušyć apazicyju ŭ krainie.
