Bloomberg: Si Czińpin paprasiŭ Pucina «nie ŭryvacca» va Ukrainu
Zamiežnapalityčnaje viedamstva Kitaja 14 studzienia nahadała, što ŭsie krainy abaviazanyja vykonvać rezalucyju AAN ab alimpijskim pieramirji, jakoje ŭ staražytnyja časy pačynała dziejničać za siem dzion da pačatku hulniaŭ.
Fota Śje Chuanczi / Sińchua.
Pavodle infarmacyi ahienctva, Si Czińpin takim čynam choča ŭmacavać svoj aŭtarytet napiaredadni pačatku treciaha terminu na čale Kitaja.
Padčas niadaŭniaj razmovy z prezidentam Rasii Uładzimiram Pucinym kiraŭnik KNR Si Czińpin moh paprasić jaho «nie ŭryvacca» va Ukrainu padčas Alimpijskich hulniaŭ u Piekinie, jakija projduć z 4 pa 20 lutaha. Pra heta paviedamlaje Bloomberg sa spasyłkaj na nienazvanaha dypłamata ŭ stalicy Kitaja.
Pavodle infarmacyi krynicy, kitajski lidar imkniecca ŭmacavać svoj aŭtarytet jak unutry krainy, tak i ŭ śviecie napiaredadni pačatku svajho treciaha terminu na pasadzie, I kryzis u Jeŭropie — «apošniaje, što jamu treba».
Jak piša Bloomberg, mienavita ŭ suviazi z hetym zamiežnapalityčnaje viedamstva Kitaja 14 studzienia nahadała, što ŭsie krainy abaviazanyja vykonvać rezalucyju AAN ab alimpijskim pieramirji, jakoje ŭ staražytnyja časy pačynała dziejničać za siem dzion da pačatku hulniaŭ i musić doŭžycca siem dzion paśla zakančeńnia Paralimpijskich hulniaŭ. U 2022 hodzie heta časovy pramiežak z 28 studzienia pa 20 sakavika.
Vajennyja analityki mierkavali, što viasnoj, u raspucicu, pierasoŭvańnie vojskaŭ uskładniajecca. Mnohaje pakazvała, što Rasija padrychtavała siły dla ataki zimoju.
Čytajcie taksama: Dziarždep: Dla Alaksandra Łukašenki i ludziej, jakija trymajuć jaho va ŭładzie, nadyšoŭ «momant, kali treba vyrašać»
Pra pahrozu novaha ŭvarvańnia Rasiei va Ukrainu zachodnija raźviedki zahavaryli ŭ listapadzie, paśla taho jak Maskva sabrała na miežach z Ukrainaj vialikija siły. Na siońnia jana praciahvaje pierakidać dadatkovyja čaści z Dalokaha Uschodu.
Dadatkovuju tryvohu va Ukrainie i śviecie vyklikała infarmacyja ab praviadzieńni biełaruska-rasijskich vučeńniaŭ uzdoŭž paŭnočnaj miažy Ukrainy. Minabarony Biełarusi nazvała metaj vučeńniaŭ acenku hatovaści sił Sajuznaj dziaržavy da abarony miežaŭ.
U pryvatnaści, u Biełarusi, siarod inšaha, razhornutyja 12 rasiejskich źniščalnikaŭ Su-35 i procirakietnyja sistemy S-400.
Zajaŭlena, što pieršaja častka vučeńniaŭ projdzie da 9 lutaha, druhaja — 10—20 lutaha.
Žychary Bresckaj i Homielskaj abłaściej Biełarusi paviedamlajuć ab prysutnaści rasijskich vajskoŭcaŭ i techniki kala roznych nasielenych punktach. Akramia taho, paviedamlajecca ab pieramiaščeńni rasijskaj vajennaj techniki pa čyhuncy Maskva-Minsk-Brest. Dziasiatki fatahrafij i pastoŭ pra heta źjavilisia ŭ sacyjalnych sietkach i telehram-kanałach. U telehram-kanale čyhunačnikaŭ prajšła infarmacyja, što z Rasii ŭ Biełaruś prybudzie 200 vajskovych ešałonaŭ z žyvoj siłaj i technikaj, čaho nikoli nie byvała raniej.
