Amierykanski samalot raźviarnuŭsia nad akijanam, bo adna z pasažyrak admoviłasia nadzieć masku
Samalot kampanii American Airlines, jaki nakiroŭvaŭsia z Majami ŭ Łondan, viarnuŭsia ŭ aeraport, bo adna z pasažyrak admoviłasia nadzieć masku. Pa dadzienych słužby adsočvańnia palotaŭ Flight Aware, rejs AAL38 sa 129 pasažyrami na borcie raźviarnuŭsia nad akijanam prykładna praz hadzinu paśla vyletu, piša Bi-Bi-Si.
Fota ilustracyjnaje. Boarding2Now / depositphotos.com
Incydent adbyŭsia jašče ŭ sieradu, ale jahonyja detali stali viadomyja tolki ciapier sa słovaŭ pasažyraŭ, a taksama z paviedamleńnia samoj avijakampanii, jakaja ŭniesła pasažyrku ŭ śpis asob, jakim zabaroniena latać rejsami American Airlines padčas rasśledavańnia incydentu.
Pasažyr taho rejsa Styŭ Fryman u navinavaj prahramie «Miami's local 10 news» raskazaŭ, što žančyna siadzieła zzadu jaho ŭ biznes-kłasie.
«U jaje było šmat vypiŭki i ja krychu niervavaŭsia. Ja bačyŭ, jak na tabło niekalki razoŭ źjaŭlaŭsia nadpis, što ŭ samalocie nielha znachodzicca biez maski. I čakaŭ, što niešta padobnaje moža zdarycca», — napisaŭ jon.
U vyniku samalot sapraŭdy raźviarnuŭsia i pasažyrku, jakoj, nakolki viadoma, za sorak, vyvieli dy pieradali palicyi. Usim astatnim pasažyram kvitki pamianiali na inšyja rejsy. Mnohija ź ich byli šakavanyja, u tym liku pavodzinami avijakampanii:
«Nam ničoha nie skazali. Ja dumała, što i bortpravadnikam ničoha nie skazali. Adzinaje, što my pačuli ad piłotaŭ, dyk heta toje, što z adnym z pasažyraŭ adbyłasia nadzvyčajnaja situacyja i nam pryjdziecca raźviarnucca»,
— raskazała jašče adna pasažyrka.
Pavodle źviestak Fiederalnaha avijacyjnaha ŭpraŭleńnia ZŠA, z pačatku pandemii adbyłosia amal 6 tysiač incydentaŭ z pasažyrami samalotaŭ, jakija admovilisia vykonvać karanavirusnyja praviły.
Tolki za pieršyja dva tydni hetaha hoda avijakampanii paviedamili pra 151 incydent. Bolšaść ź ich źviazanyja z pasažyrami, jakija admovilisia nadziavać maski.
