U Rasii prahnazujuć, što vajna z Ukrainaj abrynie ich rubiel na 20%. A što budzie ź biełaruskim?
Analityki padličyli, što kali adbudziecca vajennaja eskałacyja va Ukrainie i suprać Rasii ŭviaduć sankcyi, to rasijski rubiel upadzie na 20%. Što tady čakaje biełaruskuju valutu? Jość dva varyjanty, i abodva kiepskija.
Dapuścim, što prahnoz analitykaŭ «Reniesans Kapitała», pryviedzieny vyšej, praŭdzivy. Ekanamist BEROC Leŭ Lvoŭski nahadvaje, što naš rubiel mocna zaležyć ad rasijskaha.
«Rasija dla nas samy hałoŭny handlovy partnior, na jaje prypadaje 50% našaha źniešniaha handlu. Adpaviedna, kali kurs rasijskaha rubla mocna źmianiajecca i niama niejkich asobnych faktaraŭ, jakija dziejničajuć na Biełaruś u procivahu, to biełaruski rubiel budzie iści za im», — kaža ekanamist.
Kali eskałacyja zdarycca i Biełaruś budzie zamiašanaja ŭ vajennym kanflikcie, to ŭsie niehatyŭnyja efiekty padvojacca ci patrojacca, miarkuje Lvoŭski.
«Sankcyi, jakija zakranuć Rasiju, zakranuć i Biełaruś. Ukraina jak važny handlovy partnior, dla nas moža adpaści. Heta budzie našmat bolš surjozna, čym usie sankcyi, abjaŭlenyja dahetul».
Pra toje, što ŭsio zaležyć ad pavodzin Biełarusi ŭ mahčymym kanflikcie, kaža i staršy analityk «Alpary Jeŭrazija» Vadzim Iosub. Jon razvažaje pra dva scenaryi:
«Pieršaj reakcyjaj na takoje raźvićcio padziej było b toje, što dalar i jeŭra adnosna biełaruskaha rubla vyraśli b na 10%, i na stolki ž adnosna jaho ŭpaŭ by rasijski rubiel. Tady heta prosta vahańni na zamiežnych rynkach, košyk istotna nie mianiajecca.
Hetaja viersija ŭličvaje, što ŭzbrojeny kanflikt nie zakranaje Biełaruś. Tut uźnikaje «ale». My pamiatajem zajavy biełaruskaha boku ab padtrymcy Rasii. Kali ŭmoŭna pačynajecca kanflikt i Biełaruś źjaŭlajecca niepasrednim udzielnikam, tady rost zamiežnaj valuty da biełaruskaha rubla budzie taki ž, jak u Rasii».
Ale da ahučanaha prahnozu ŭ 20% jon stavicca skieptyčna.
«Hetyja razvažańni vielmi łahodnyja i nie ŭličvajuć usie sankcyi ŭ finansavaj śfiery, jakija imhnienna mohuć być pryniatyja da Rasii ŭ vypadku eskałacyi kanfliktu.
Abmiarkoŭvaŭłasia mahčymaje adklučeńnie Rasii ad SWIFT, ale kansesusu pamiž Amierykaj i Jeŭropaj nakont takoj miery niama. Ale Amieryka moža samastojna adklučyć rasijskija banki i inšyja subjekty ad dalaravych płaciažoŭ.
U hetym vypadku niemahčyma budzie pravodzić apieracyi z dalarami — navat kuplać ich za rubli na ŭnutranym rynku. Kursu prosta nie budzie, bo dalaravaha rynku nie budzie. Moža być čorny rynak najaŭnaha dalara, ale pra kurs na im biessensoŭna hadać — jon moža vyraści i na 20%, a moža i na 200%.
Kali Biełaruś budzie ŭciahnutaja ŭ apieracyju, to i da jaje buduć prymienienyja takija ž sankcyi».
Čytajcie taksama:
Čaho choča Rasija i jakim budzie vialikaje ŭvarvańnie RF va Ukrainu. Apublikavanyja scenary
Kolki hrošaj Rasija dała Łukašenku, pačynajučy z 2020-ha? Spojler: našmat bolš, čym vy dumajecie
