Tolki 4% biełarusaŭ bačać krainu ŭ składzie Rasii. Da Pucina staŭleńnie — nieadnaznačnaje
Bolšaść biełarusaŭ ličać, što našaj krainie lepš być pa-za hieapalityčnymi sajuzami ci mieć sajuz z Rasijaj i ES adnačasova. Heta vyniki sacyjałahičnaha daśledavańnia Chatham House, što byli prezientavany siońnia.
«Prychilniki pratestu značna čaściej imknucca da ŭvachodžańnia ŭ Jeŭrasajuz (27%), a prychilniki ŭłady — da sajuza z Rasijaj (65%)», — adznačaje kiraŭnik biełaruskaha prajekta Chatham House Ryhor Astapienia.
Padčas sacyjałahičnaha daśledavańnia ŭ biełarusaŭ asobna pytalisia, jaki varyjant sajuza z Rasijaj najbolš pryvabny.
Bolšaść chacieli b mieć z RF zonu svabodnaha handlu (27%) ci adzinuju ekanamičnuju prastoru (41%). U mienšaści tyja, chto bačyć prastoru z adzinaj źniešniej palitykaj i armijaj (12%) albo vystupaje za ŭvachod u skład Rasii (4%). Niamała apytanych vybrali varyjant «Ni adzin ź pieraličanych».
Da Pucina ŭ biełaruskim hramadstvie dosyć palarnaje staŭleńnie. Prychilniki pratestu ŭsprymajuć jaho drenna ci vielmi drenna (69%), prychilniki ŭłady — dobra ci vielmi dobra (90%). A ŭ niejtralnaj častki staŭleńnie schilajecca da dobraha — bolš za 60% staviacca da prezidenta Rasii chutčej stanoŭča.
«Važna razumieć, što ŭvohule biełarusy dobra staviacca da ŭsich krain, — adznačaje kiraŭnik biełaruskaha prajekta Chatham House Ryhor Astapienia. — Antyrasijskaść ci antyamierykanizm — vielmi nišavyja źjavy, jany niepapularnyja ŭ biełaruskim hramadstvie».
Rejtynh Łukašenki nie mianiajecca paŭtara hoda. Čamu? Jość tłumačeńnie
