SK kupiŭ prahramu dla ŭzłomu parolaŭ i vykački infarmacyi z Telegram. Ekśpiert tłumačyć, nakolki heta realna
Centralny aparat Śledčaha kamiteta patraciŭ bolš za 135 tysiač rubloŭ ź biudžetu na zakupku prahramy «Mabilny kryminalist Ekśpiert Plus», jakuju raspracavała rasijskaja kampanija, jaje taksama zakupajuć pravaachoŭnyja orhany Rasii i Kazachstana. Raspracoŭščyki śćviardžajuć, što prahrama dazvalaje abyści aparatnaje šyfravańnie na mabilnych telefonach, a taksama dapamahaje dastać danyja z mesendžara Telegram.
Jak vynikaje z płanu zakupak, Śledčy kamitet druhi raz nabyvaje prahramnaje zabieśpiačeńnie «Mabilny kryminalist Ekśpiert Plus», sioleta na heta pajšło 135,5 tysiačy rubloŭ, letaś — amal 322 tysiačy rubloŭ.
Raspracoŭkaj prahramy zajmajecca rasijskaja kampanija «Oksidžen Softver», jakaja bačyć svaju misiju tak: «My dapamahajem hramadstvu stanavicca bolš biaśpiečnym, pradastaŭlajem šyrokija mahčymaści ŭ halinie ličbavaj kryminalistyki.
Rašeńniami našaj kampanii ŭ pytańniach vymańnia i daśledavańnia danych z mabilnych pryład, vobłačnych servisaŭ, piersanalnych kampjutaraŭ i dronaŭ karystajucca pravaachoŭnyja orhany, dziaržaŭnyja ŭstanovy, a taksama słužby biaśpieki kamiercyjnych arhanizacyj Rasii i krain SND».
Siarod jaje biełaruskich klijentaŭ nie tolki Śledčy kamitet, ale i Biełtelekam.
Prahrama «Mabilny kryminalist», jak adznačajuć raspracoŭščyki, vykačvaje danyja z usich papularnych pryład na iOS, Android, Windows Phone, BlackBerry, Symbian, a taksama z kitajskich aparataŭ.
Skrynšot z prezientacyi prahramy
Padtrymlivajecca zahruzka vyjaŭ pryład: bekapy iTunes i Android, JTAG i Chip-off vyjavy. Ekśpierty taksama mohuć atrymać danyja z fłeš i SIM-kart. Prahrama dazvalaje abychodzić błakavańnie ekrana abo zdymać paroli, jakija abaraniajuć pryłady. «Mabilny kryminalist» taksama padbiraje paroli da zašyfravanych reziervovych kopij i vyjaŭ.
Raspracoŭščyki zajaŭlajuć, što prahrama dapamahaje dastać danyja mesendžara Telegram z prahramy, ustalavanaj na telefonie ci kampjutary abo vobłačnaha servisu. Pry dapamozie prahramy, nibyta možna bačyć usie dziejańni, zroblenyja z mabilnaha telefona (zvanki, paviedamleńni, hieadanyja i inšyja vidy aktyŭnaści ŭ chranałahičnym paradku). Taksama «Mabilny kryminalist» dazvalaje sistematyzavać danyja pa bilinhu, jakija pradastaŭlaje mabilny apieratar.
Śledčy kamitet patracić ź biudžetu istotnyja sumy na ličbavyja abnaŭleńni i biaśpieku. Z płanu zakupak vynikaje, što 400 tysiač rubloŭ pojdzie na dostup i abnaŭleńnie Microsoft, bolš za 80 tysiač rubloŭ na padtrymku sistemy infarmacyjnaj biaśpieki, 130 tysiač rubloŭ na prahramny kompleks, jaki vyjaŭlaje słabyja baki infarmacyjanaj biaśpieki, taksama vydzialajucca srodki na abaronienuju telefonnuju suviaź i pierasyłku paviedamleńniaŭ pad hryfam «dla słužbovaha karystańnia» (ahułam bolš za 12 tysiač rubloŭ).
Ekśpiert pa ličbavaj biaśpiecy: «Hety soft moža ŭzłamvać maksimum iPhone 8»
«Rasijskaje abstalavańnie SK zakuplaje, bo skončyłasia trochhadovaja licenzija, — raskazaŭ «Našaj Nivie» ekśpiert u ličbavaj biaśpiecy. — Heta słaby rasijski kankurent izrailskaj raspracoŭki Cellebrite, jakaja sapraŭdy šmat što moža, ale biełaruskim orhanam jaho nie pradajuć i nie abnaŭlajuć praz sankcyi.
A hałoŭnaja zadača «Mabilnaha kryminalista» — heta ŭ zručnym vyhladzie raskłaści infarmacyju z užo razbłakavanaha devajsa.
Sami mahčymaści ŭzłomu techniki ŭ hetaj prahramy davoli ścipłyja. Kali my kažam pra papularnyja ajfony, to hety soft moža ŭzłamvać maksimum iPhone 8, pra što zajaŭlaje i sam vytvorca, bo hetyja madeli ŭžo nie padtrymlivajuć najnoŭšyja abnaŭleńni iOS.
Uzłamać novy šyfravany Samsung taksama niemahčyma. «Šyfravany» — aznačaje nie prosta parol, ale i šyfravańnie pryłady, dzie składanaść šyfravańnia hienierujecca i zaležyć ad unikalnaha parola na devajsie. U teoryi ŭzłamać mahčyma, ale na heta sydzie vielmi-vielmi šmat času.
Ahułam ža praviła takoje — lubaja pryłada, jakaja zašyfravanaja i padtrymlivaje najnoŭšyja abnaŭleńni apieracyjnaj sistemy, harantavana niedasiažnaja da ŭzłomu rasijskaj pryładaj.
Vytvorcy sočać za aktyŭnaściu lidara rynku — Cellebrite, i zakryvajuć abnaŭleńniami ŭzraźlivaści, jak tolki pra ich stanovicca viadoma.
Adzinaje što niehatyŭnaja charaktarystyka dla takich marak telefonaŭ, jak Huawei, Honor i hetak dalej. iPhone i Samsung — technika nadziejnaja.
Što tyčyć kampjutaraŭ, to kampjutary, abaronienyja nie tolki parolem, ale i šyfravańniem, kštałtu BitLockera — nie ŭzłamvajucca. «Mabilny kryminalist» uvohule vielmi niadaŭna pačaŭ pracavać z kampjutarami».
«Telegram zabłakavać vielmi prablematyčna». Śledčy raskazaŭ, što ŭskładniaje baraćbu z kibierzłačynstvami ŭ Biełarusi
Siłaviki raskrytykavali Synesis i pieradali prava sačyć za biełarusami Biełtelekamu. Chto raspracuje novuju prahramu?
Jakija kampanii pierastali supracoŭničać ź Biełaruśsiu z-za palityki
