Bajden zajaviŭ ab sankcyjach, jakija «Pucin nikoli nie bačyŭ»
U vypadku eskałacyi va Ukrainie Rasija sutykniecca z «žorstkimi ekanamičnymi nastupstvami», u pryvatnaści, jaje banki nie zmohuć pravodzić apieracyi z dalarami, zajaviŭ Bajden.
Fota Reuters
Rasiju čakajuć «katastrafičnyja nastupstvy», kali kraina prajavić ahresiju ŭ dačynieńni da Ukrainy. Pra heta na pres-kanfierencyi zajaviŭ prezident ZŠA Džo Bajden, piša RBK.
Pavodle jaho słoŭ, prezident Rasii Uładzimir Pucin «nikoli nie bačyŭ sankcyj», padobnych da tych, jakija Bajden paabiacaŭ uvieści ŭ vypadku, kali ŭvarvańnie va Ukrainu adbudziecca. U pryvatnaści, zajaviŭ prezident ZŠA, u vypadku eskałacyi Rasija sutykniecca z «žorstkimi ekanamičnymi nastupstvami», a jaje banki nie zmohuć pravodzić apieracyi z dalarami.
U Rasii jość vajskovaja pieravaha nad Ukrainaj, i ŭ vypadku ŭzbrojenaha kanfliktu kraina pieramoža, ale ŭ budučyni paniasie straty — «u blizkaj, siarednieterminovaj i karotkaterminovaj pierśpiektyvie», dadaŭ Bajden. Pavodle jaho słoŭ, maštab sankcyj ZŠA i sajuźnikaŭ budzie zaležać ad kankretnych dziejańniaŭ Maskvy.
Bajden ličyć, što rasijskija ŭłady pakul nie pryniali kančatkovaha rašeńnia adnosna dziejańniaŭ va Ukrainie. Adnak, jon pierakanany, što Pucin «pavinien niešta zrabić». Amierykanski prezident pry hetym upeŭnieny, što Rasija nie choča paŭnamaštabnaj vajny z Zachadam.
Prezident ZŠA pryznaŭ, što Złučanyja Štaty i krainy Jeŭropy paniasuć škodu ŭ vypadku ekanamičnych sankcyj suprać Rasii, adnak dla Maskvy, ź jaho słoŭ, nastupstvy buduć bolš adčuvalnymi.
