Chutkasnaha tramvaja ŭ Minsku nie budzie
U 2019 hodzie staličnyja ŭłady ŭpeŭniena kazali pra zapusk chutkasnaha tramvaja ŭ Minsku na praciahu šaści-siami hadoŭ. Byŭ navat paznačany maršrut, pa jakim jon pojdzie — z Sucharava ŭ centr (da vulicy Kłary Cetkin). Ale siońnia staršynia harvykankama zajaviŭ, što hety prajekt užo nie aktualny.
«Prajekt nie znajšoŭ padtrymki ŭ staličnaj ułady, — cytuje staršyniu Minharvykankama Uładzimira Kucharava infarmahienctva «Minsk-Naviny». — Transpartnaje pytańnie zakryjuć novymi stancyjami mietro, elektrobusami, tralejbusami z aŭtanomnym chodam. Elektratranspart siońnia ŭ suśvietnym trendzie, i Minsk aktyŭna raźvivaje hety napramak. Ale tramvaj nie samaje zručnaje i efiektyŭnaje rašeńnie, zychodziačy z vydatkaŭ. Pierśpiektyŭniej raźvivać elektrobusy. Ich u nas vyrablajuć adrazu dva pradpryjemstvy: MAZ i «Biełkamunmaš». Da kanca hoda my raźličvajem atrymać pad ich batarei bolšaj mahutnaści biełaruskaj vytvorčaści».
Raniej pad ideju chutkasnaha tramvaja navat źbiralisia pierarablać vulicy Charkaŭskaja, Panamarenki, Šaranhoviča. Nazyvalisia i ličby: na budaŭnictva kiłamietra chutkasnych tramvajnych šlachoŭ nibyta patrabavałasia 20 młn dołaraŭ u paraŭnańni z 80 młn za kiłamietr mietro. Ale ciapier pieramahli niejkija inšyja raźliki.
